काठमाडौं (हाम्रो खेलकुद) – विश्व फुटबलको सर्वोच्च निकाय (फिफा) ले बिहीबार सार्वजनिक गरेको नयाँ फिफा वरियतामा नेपाल यथावत स्थानमा रहन सफल भएको छ ।

नयाँ वरियतामा नेपाल १ सय ६८औं स्थानमा यथावत रहन सफल भएको थियो । नेपालले (सेप्टेम्वर) मा छिमेकी प्रतिद्धन्द्धी भारतसँग दुई अन्तर्राष्ट्रिय मैत्रीपुर्ण खेल खेलेको थियो । पहिलो मैत्रीपुर्ण खेलमा नेपालले अग्रता जोगाउन नसक्दा भारतसँग १–१ गोलको बराबरी खेलेको थियो । दोस्रो मैत्रीपुर्णमा नेपालले २–१ को हार बेहोरेको थियो ।

दक्षिण एसियाली राष्ट्रको वरीयतामा नेपाल तेस्रो स्थानमा रहेको छ । नेपालभन्दा अघि भारत र माल्दिभ्स रहेको छ । भारत १ सय ७ औं स्थानमा रहेको छ । माल्दिभ्स १५८औं स्थानमा रहेको छ । नेपालभन्दा तल भुटान, बंगलादेश, श्रीलंका र पाकिस्तान रहेको छ ।

बंगलादेश १८९औं, भुटान १८७औं, पाकिस्तान १९८औं र श्रीलंका २०५औं स्थानमा रहेका छन् । नयाँ वरीयताको शीर्ष स्थानमा बेल्जियम यथावत रहेको छ । यस्तै ब्राजिल दोस्रो स्थानमा यथावत रहेको छ । इंग्ल्यान्ड तेस्रो स्थानमा उक्लिदा फ्रान्स चौथो स्थानमा झरेको छ ।

इटाली र अर्जेन्टिना पाँचौ र छैटौ स्थानमा रहँदा पोर्चुगलले एक स्थान सुधार गर्दै सातौ स्थानमा उक्लदा स्पेन एक स्थान तल झर्दै आठौं स्थानमा पुगेको छ । मेक्सिको नवौं स्थानमा यथावत रहँदा डेनमार्क शीर्ष १० उक्लिएको छ । वरीयतामा नेदरल्यान्ड र उरुग्वेले पनि वरियतामा सुधार गरे ।