एजेन्सी – स्पेनिस ला लिगामा आज (शनिबार) राति विभिन्न चार खेलमा प्रतिस्पर्धा हुँदा एट्लेटिको म्याड्रिड र एथलेटिक बिल्वाओबीच प्रतिस्पर्धा हुँदैछ ।

खेल एट्लेटिको म्याड्रिडको घरेलु मैदान वान्डा मेट्रो पोलिटानोमा राति ८ बजे हुनेछ । एथलेटिक बिल्वाओलाई हराउँदै एट्लेटिको म्याड्रिड शीर्षस्थानमा उक्लने लक्ष्यमा हुनेछ । बिल्वाओलाई हराउन सके एट्लेटिकोले एक खेल कम खेलेको रियल म्याड्रिड र भ्यालेन्सियालाई पछि पार्नेछ । बराबरीले पनि एट्लेटिको म्याड्रिड शीर्षस्थानमा उक्लनेछ ।

टोलीसँग लुइस सुआरेज, एन्टोइन ग्रिजमन, यान्निक कारास्को, एन्जल कोरेआ, कोकी, मार्काेस लोरेन्टे, काइरन ट्रिपिएर, मारियो हर्माेसो, जोस जिमिनेज, स्टेफन साभिच र गोलरक्षक जान ओब्लाक रहेका छन् । यस्तै जोआओ फेलिक्स, म्याथिएस कुन्हा, रोड्रिगो डि पल र रेनान लोडी पनि टोलीमा रहेका छन् ।

यता, बिल्वाओ पनि घरेलु टोलीलाई हराउँदै शीर्षस्थानमा उक्लने दाउमा हुनेछ । एट्लेटिकोलाई हराउन सके बिल्वाओले रियल म्याड्रिडसँगै भ्यालेन्सिया, एट्लेटिको म्याड्रिड र रियल सोसिडाडलाई पछि पार्नेछ । टोलीसँग इनाकी विलियम्स, राहुल गार्सिया, इकर मुनिएन, युनाई भेन्सेडोर, डानी गार्सिया, इनिगो मार्टिनेज, युनाइ नुनेज, इनिगो लेकुइ र गोलरक्षक युनाई सिमोन रहेका छन् ।

यि दुई टोलीबीचको पछिल्लो २५ भिडन्तमा एट्लेटिको १७ खेलमा विजयी भएको छ । बिल्वाओले ५ खेल आफ्नो पक्षमा पार्दा ३ खेल बराबरीमा सकिएको छ । पछिल्लो दुई दुवै टोलीले समान एक–एक जित निकालेका छन् । त्यसअघिको खेल १–१ गोलको बराबरी खेलेका थिए ।

अन्य खेल

रायो भालेकानोविरुद्ध गेटाफे (राति ५:४५ बजे)

इल्चेविरुद्ध लेभान्टे (राति १०:१५ बजे)

डिपोर्टिभो एलाभेसविरुद्ध ओसासुना (राति १२:४५ बजे)

स्पेनिस ला लिगाको सबै खेलको प्रत्यक्ष प्रसारण एक्सन स्पोर्ट्स एचडी २ बाट भइरहेको छ ।