एजेन्सी – स्पेनिस ला लिगामा आज (आइतबार) राति विभिन्न चार खेलमा प्रतिस्पर्धा हुँदा रियल म्याड्रिडले भ्यालेन्सियाको भ्रमण गर्दैछ । खेल भ्यालेन्सियामा नेपाली समयअनुसार राति १२:४५ बजे हुनेछ ।

रियल म्याड्रिड घरेलु टोलीलाई हराउँदै ला लिगाको शीर्षस्थानमा उक्लने लक्ष्यमा हुनेछ । भ्यालेन्सियालाई हराउन सके रियलले शहरी प्रतिद्धन्द्धी एट्लेटिको म्याड्रिडलाई पछि पार्नेछ । पाँचौ चरणको खेल जारी रहँदा एट्लेटिको ५ खेलबाट ११ अंक जोडेर शीर्षस्थानमा रहेको छ । एक खेल कम खेलेको रियल र भ्यालेन्सियाको समान १० अंक छ ।

रियलसँग लयमा रहेको कप्तान करिम बेन्जेमा र भिनिसियस जुनियर टोलीका लागि मुख्य हतियार हुनेछन् । बेन्जेमाले यो सिजन चार खेलमा ५ गोल तथा ४ असिस्ट दिइसकेका छन् । भिनिसियसले यो सिजन चार खेलमा चार गोल गरिसकेका छन् । यस्तै टोलीसँग इडेन हाजार्ड, लुका मोड्रिच, क्यासमिरो, फेडे भाल्भेर्डे, डेभिड अलाबा, इडुआर्डाे कामाभिंगा, नाचो फर्नान्डेज, इडर मिलिसाओ, ड्यानी कार्भाजल र गोलरक्षक थिवाउट कोर्टुवा रहेका छन् ।

यता, भ्यालेन्सिया पनि रियललाई स्तब्ध पार्दै रियल र एट्लेटिको म्याड्रिडलाई पछि पार्दै शीर्षस्थानमा उक्लने योजनमा मैदान उत्रनेछ । टोलीसँग म्याक्सिमिलियानो गामेज, गोन्कालो गुइडेस, ड्यानियल वास, ह्युगो गुइलामोन, कार्लाेस सोलेर, जोस गाया, ओमर एल्डररेट, गाव्रियल पौलिस्टा, थिएरी कोरेइआ र गोलरक्षक जिओर्जी मामारदासभिली रहेका छन् ।

यि दुई टोलीबीचको पछिल्लो २४ खेलको नतिजामा रियलले १३ खेल आफ्नो पक्षमा पारेको छ । ४ खेल भ्योलन्सियाले जित्दा ८ खेल बराबरीमा सकिएको छ । गत सिजन यि दुई टोली समान एक जित निकालेका थिए ।

अन्य खेल

रियल मलोर्काविरुद्ध भिल्लारियल (साँझ ५:४५ बजे)

रियल सोसिडाडविरुद्ध सेभिया (राति ८ बजे)

रियल बेटिसविरुद्ध स्पान्योल (राति १०:१५ बजे)