एजेन्सी – युरोपियन गोल्डेन बुट अवार्ड जितेका बार्यन म्युनिखका फरवार्ड रोबर्ट लेवान्डोवस्कीले रियल म्याड्रिडका फरवार्ड करिम बेन्जेमाको तारिफ गरेका छन् । उनले बेन्जेमाको खेल्ने शैलीको खुलेर चर्चा गरे ।

बुन्डेसलिगामा गत सिजन ४१ गोल गरेका लेवान्डेवस्कीलाई टोलीलाई लिउ उपाधि दिलाउन महत्वपूर्ण योगदान गरेका थिए । ‘ गोल गरेका कारणले मात्र मैले बेन्जेमाको तारिफ गरेको होइन । उनी खेल्दा टोलीलाई नै प्रेरित गर्छन्’, उनले भने,‘उनी टोलीका लागि खेल्छन् मलाई त्यो सबैभन्दा राम्रो लाग्छ । उनी उत्कृष्ट खेलाडी हुन् ।’

पोल्यान्डका अन्तर्राष्ट्रियले रियलका अध्यक्ष फ्लोरेन्टिनो पेरेजलाई दुई पटक भेटेको पनि खुलासा गरेका छन् । तर त्यो भेटमा भएको कुराकानी भने उनले खुलाउन चाहेनन् । ‘साच्चै हो पेरेजसँग पटक पटक भेट भएको छ । त्यसमध्ये एक पटक रियलविरुद्ध खेल्दा भएको थियो’, उनले थपे, ‘तर भेटमा के कुरा भयो त्यो म बताउन सक्दिन ।’

अर्को लिग खेल्ने विषयमा सोधिएको प्रश्नमा अहिले त्यस्तो इच्छा भएको बताए । तत्काल अर्को लिग जाने सम्भावना नभएको पनि उनले प्रष्ट पारेका छन् । ‘अहिले मेरो दिमागमा त्यो विषय छैन । म शतप्रतिशत बायर्नमा केन्द्रित छु’, उनले भने, ‘सम्भावनाको विषय जहिले पनि रहन्छ । तर मैले अन्य देशका लिगका च्याम्पियनसको सामना गरिसकेको छु । त्यसैले अन्य लिग खेल्न आवश्यक छ जस्तो लाग्दैछ ।’