एजेन्सी – क्याटलान क्लब बार्सिलोनाका युवा फरवार्ड अन्सु फातीका अनुसार क्लबले सिजनको अन्त्यमा स्पेनिस ला लिगा र यूईएफए च्याम्पियन्स लिगको उपाधिका लागि प्रतिस्पर्धा गरिरहेको हुनेछ ।

लामो समय चोटका कारण मैदानबाहिर रहेका फातीले आइतबार लेभान्तेविरुद्ध खेल्दै पुनरागमन गरे । वैकल्पिक खेलाडीका रुपमा मैदान प्रवेश गरेका उनले टोलीको जितमा गोल समेत गरे । यससँगै उनले टोलीको तीन खेल चलेको जितविहिन सिलसिलामा पनि पूर्णविराम लगाए ।

अर्जेन्टिनी फरवार्ड लिओनेल मेस्सीले क्लब छाडेपछि क्लब समस्यामा परेको छ । प्रशिक्षक रोनाल्ड कोम्यान पनि निरन्तर खराब नतिजाका कारण दबाबमा छन् । तर चोटबाट पुनरागमन गरेका फाती टोलीको लागि सिजन राम्रो हुनेमा सकारात्मक छन् । उनले त्यसको उदाहरण आइतबारको खेलमा पनि प्रस्तुत गरे ।

‘हामी बार्सिलोना हौं । हामी खेलेका सबै प्रतियोगिताको उपाधिका लागि खेल्नेछौं । विशेषगरी स्पेनिस ला लिगा र च्याम्पियन्स लिगमा हाम्रो नजर छ,’ उनले भने, ‘हुन त सबै टोली सम्पूर्ण उपाधिका लागि खेल्ने लक्ष्य राख्छन् । तर हामी बार्सा हौं र निरन्तर मिहिनेत गर्नेछौं ।’

मेस्सीको प्रस्थानपछि बार्सिलोनामा फातीले प्रतिष्ठित जर्सी नम्बर १० प्रयोग गर्ने भएका छन् । फातीले उक्त जर्सी लगाउँदा कुनै दबाब महसुस नभएको बताए । ‘म लिओपछि यो जर्सी लगाउन पाउँदा गौरवान्वित छु । म क्लब र कप्तानहरुलाई धन्यवाद भन्न चाहन्छु । मलाई कुनै दबाब छैन । यो नम्बरले क्लबको लागि धेरै योगदान दिएको छ र मैले लगाउन पाउँदा खुसी छु,’ उनले भने ।