एजेन्सी – यूईएफए च्याम्पियन्स लिग अन्तर्गत बुधबार हुने चेल्सीविरुद्ध समूह चरणको खेलमा युभेन्टसका फरवार्ड द्वय पाउलो डिबाला र अल्भारो मोराटा नखेल्ने भएका छन् ।

युभेन्टसका प्रशिक्षक मासिमिलिआनो एलेग्रीले दुवै फरवार्डले इटालियन सिरी ए का दौरान चोट बोकेपछि च्याम्पियन्स लिग खेल गुमाउने बताएका हुन् । लिगमा लगातार जित दर्ता गर्ने क्रममा युभेन्टसले साम्पडोरियालाई ३-२ ले हराएको थियो । उक्त खेलमा सुरुवाती अग्रता दिलाएका डिबाला खेलको दोस्रो हाफमा चोट बोकेपछि आँशु झार्दै मैदान छाड्न बाध्य भएका थिए ।

‘अब हामीले मोराटा र डिबालाबिना कसरी खेल्ने भन्ने सोच्नुछ । हाम्रो लागि यो निर्णायक खेल त होइन । जेनिटविरुद्ध खेलका लागि हामी तयार हुनुछ,’ प्रशिक्षक एलेग्रीले भने । मोराटा पनि त्यसै खेलमा चोट बोकेपछि उनको पूर्व क्लब चेल्सीविरुद्ध नखेल्ने भएका हुन् ।

टोलीका मिडफिल्डर म्यानुएल लोकाटेलीले भने डिबालाको कमी महसुस हुने बताए । ‘आशा गरौं चोट गम्भीर छैन । उनी हाम्रा टोलीका महत्त्वपूर्ण खेलाडी हुन् । चाडै मैदान फर्कनेछन् भन्ने आशा छ,’ उनले भने ।

युभेन्टस च्याम्पियन्स लिगको समूह एचमा रहेको छ । पहिलो चरणमा माल्मोलाई ३-० ले हराएको इटालियन टोलीले अब चेल्सीसँग खेल्दैछ । चेल्सीले पहिलो खेलमा जेनिटलाई १-० ले हराएको थियो ।