काठमाडौं (हाम्रो खेलकुद) – स्वदेश फर्केलगत्तै राष्ट्रिय फुटबल खेलाडी विमल घर्तिमगरले व्यक्तिगत रुपमा प्रशिक्षण सुरु गरेका छन् । घुँडाको शल्यक्रियाका लागि कतार गएका विमल ९ महिना भन्दा लामो समयपछि स्वदेश फर्केका थिए ।

विमल आइतबार स्वदेश फर्केका थिए । एन्फा एकेडेमीको मैदानमा प्रशिक्षण गरिरहेको यू२३ टोलीसँगै विमलले मंगलबार प्रशिक्षण गरेका थिए । गत वर्ष पुसमा राष्ट्रिय टोलीको प्रशिक्षकका दौरान सोही मैदानमा विमलको घुँडामा चोट लागेको थियो । उनको घुँडाको एन्टेरियर क्रुसिएट लिगामेन्ट (एसीएल) च्यातिएको थियो ।

‘लामो समयपछि प्रशिक्षणमा फर्केको त्यो पनि घाइते भएकै मैदानमा । फेरि त्यस्तै होला भन्ने मनमा अलि डर जस्तो त हुने रहेछ’, विमलले भने, ‘भिडेर प्रशिक्षण गरेको छैन । धेरै पछि मैदानमा फर्कदा उत्साहित छु ।’

मैदान फर्कंदा रमाइलो महसुस भएको जनाउँदै विमलले भने नयाँ जोश आएको छ । ‘अहिले एक्लै प्रशिक्षण गरेको छु । भिडेर खेलेको छैन,’
९ महिना अगाडि कतार जाँदा त्यति लामो समय कसरी बसिएला भन्ने लागेको स्मरण गर्दै विमलले भने, ‘तर मैले सोचे भन्दा कतार बसाई निकै सुखद भयो । घरबाट टाढा भएको महसुस हुन पाएन । सञ्जिव रानाभाट, फुटबल खेलाडी स्यान्सु भुसालका बाबालगायत आफन्तहरु पनि हुनुहुन्थ्यो । त्यहाँ हुने सबैलाई धन्यवाद दिन चाहन्छु मलाई एक्लो हुन दिनुभएन ।’

कतारस्थित अस्पेटार अस्पतालमा फागुन २५ गते उनको घुँडाको सफल शल्यक्रिया भएको थियो । त्यसयता आफ्नो घुँडामा निकै सुधार भएको विमलले बताएका । एक महिना जति प्रशिक्षणमा सामेल भएपछि मात्र मैदान फर्कने सम्भावना रहेको उपचारमा संलग्न चिकित्सकहरुले बताएको विमलले बताएका छन् ।

‘सबै सोचे जस्तै सुधार हुँदै गयो भने लिग खेल्ने सम्भावना छ’, विमलले भने, ‘म अहिले हतार गर्नेमा छैन । क्लबहरुबाट प्रस्ताव आइरहेको छ । तर पहिला आफू राम्ररी ठीक भएपछि मात्र त्यो विषयमा सोच्नु छु ।’

विमलले पूनरागमनका लागि आफू उत्साहित भने रहेको सुनाए । ‘उत्साह जति छ आउने दिन मेरो लागि चुनौतीपूर्ण पनि छ’, विमलले भने, ‘म त्यसमा सचेत छु । फेरि एकपटक मैदानमा उच्च प्रदर्शनका लागि प्रतिबद्ध छु ।’

विमलले गत सिजन मछिन्द्रबाट लिग जितेका थिए । उनी अन्तिम समयमा मछिन्द्रमा आवद्ध भएका थिए । त्यसअघि उनले नेपालमा थ्री स्टारबाट पनि खेलिसकेका छन् । उनले भारतको मोहुन बगान र माल्दिभ्सको टिसी स्पोर्ट्सबाट व्यावसायिक फुटबल खेलिसकेका छन् । विमलले सोचे जस्तो म्याचका लागि फिट भएमा कात्तिक २९ गतेबाट सुरु हुने सहिद स्मारक ए डिभिजन लिगमा उनलाई हेर्न पाइनेछ ।