एजेन्सी – पोलिस फरवार्ड रोवर्ट लेवान्डोस्कीको दुई गोल मद्दतमा जर्मन क्लब बायर्न म्युनिखले युइएफए च्यम्पियन्स लिगमा सानदार जित दर्ता गरेको छ ।

बायर्नले घरेलु मैदानमा युक्रेनी क्लब डिनामो किएभलाई ५–० को फराकिलो गोल अन्तरले पराजित गरेको हो । बायर्नको सहज जितमा सर्ज गिनाब्री, लिरोए साने र इरिक म्याक्सिम चुपो मोटिङले समान गोल गरे ।

एलिएन्ज एरिना म्युनिखमा बुधबार राति भएको एकपक्षीय खेलमा घरेलु टोली बायर्नले खेलको १२औं मिनेटमा रोवर्ट लेवान्डोस्कीको पेनाल्टी गोलबाट अग्रता लिएको थियो । पेनाल्टी बक्समा सेडोरचुकले बलले हात छोएपछि रेफ्रीले बायर्नलाई पेनाल्टी प्रदान गरेको थियो ।

त्यसअघि नवौं मिनेटमा डिनामो किएभले गोलको सुवर्ण अवसर खेर फालेको थियो । १०औं मिनेटमा डिनामो किएभका बुस्चानले लेवान्डोस्कीको प्रहारलाई विफल पारेका थिए ।

२७औं मिनेटमा लेवान्डोस्कीले व्यक्तिगत दोस्रो गोल गर्दै बायर्नको अग्रता दोब्बर पारे । उनले थोमस मुलरको पासमा गोल गर्न सफल भएका थिए । ४१औं मिनेटमा काउन्टर अट्याकमा डि पेनालको प्रयासलाई बायर्नका गोलरक्षक म्यानुयल नुएरले विफल पारे ।

६८औं मिनेटमा लिरोए सानेको पासमा सर्ज गिनाब्रीले गोल गर्दै बायर्नलाई ३–० ले अघि बढाए । ७४औं मिनेटमा लिरोए सानेले थोमस मुलरको पासमा गोल गर्दै बायर्नलाई फराकिलो जिततर्फ अग्रसर गराए ।

८७औं मिनेटमा सब्सिच्युट फरवार्ड इरिक म्याक्सिम चुपो मोटिङले गोल गर्दै बायर्नलाई ५–० को फराकिलो जित दिलाए । ७९औं मिनेटमा लेवान्डोस्कीको स्थानमा मैदान छिरेका मोटिङले बेन्जामिन पाभर्डको पासलाई सदुपयोग गरेका थिए ।

यो जितसँगै बायर्न समूह ‘ए’ मा दुई खेलबाट ६ अंक जोडेर शीर्षस्थानमा यथावत रहेको छ । पराजित डिनामो किएभ १ अंकसहित तेस्रो स्थानमा रहेको छ । बेन्फिका ४ अंक जोडेर दोस्रो स्थानमा रहँदा अंक विहीन बार्सिलोना पुछारमा रहेको छ ।