कुचिङ (हाम्रो खेलकुद)– एएफसी सोलिडारिटी कपमा नेपाल र लाओसबीचको सेमिफाइनलको निर्धारित ९० मिनेटका खेल १–१ को बराबरीमा टुंगिएको छ । अब ३० मिनेट समय थपिनेछ । त्यसमा पनि नतिजा नआएमा खेल टाइब्रेकरमा जानेछ ।
पहिलो हाफमा १–० ले पछि परेको नेपाल दोस्रो हाफको सुरुमै विमल घर्तीमगरको गोलसँगै खेलमा फर्केको थियो । ४७ औं मिनेटमा भरत खवासको क्रसलाई विमलले हेडमार्फत बराबरी गोल फर्काएका थिए । बराबरी गोलपछि नेपाली टोलीले विमलकै शैलीमा सेलिब्रेसन गरेको थियो । जारी प्रतियोगितामा दोस्रो गोल गरेका विमलको नेपाली सिनियर टोलीका लागि त्यो पाँचौं गोल हो । उनले ब्रुनाईसँग ३–० को जितमा पेनाल्टीमार्फत तेस्रो गोल गरेका थिए ।
त्यसअघि पहिलो हाफमा नेपालविरुद्ध १९ औं मिनेटमा साइ सोङ खामले हेडमार्फत गोल गरेका थिए । थ्रोमा आएको बललाई कप्तानले क्रस गरेपछि नजिक रहेका कामले ड्रप हेडमा गोल गरेका थिए । उनको प्रहार रोक्न नेपाली किपर किरण चेम्जोङले प्रयास त गरे, तर उनले भेट्टाउन सकेनन् ।
यो सेमिफाइनल विजेताले ब्रुनाई र मकाउबीचको विजेतासँग नोभेम्बर १५ मा फाइनल खेल्नेछ । अर्को सेमिफाइनल नेपाली समय अनुसार ५ः१५ मा हुनेछ ।
