काठमाडौं (हाम्रो खेलकुद) – साफ च्याम्पियनसिप २०२१ अन्तर्गत नेपाली राष्ट्रिय फुटबल टोलीले दोस्रो खेलमा श्रीलंकाको सामना गर्दैछ । राती ९:४५ बजे सुरु हुने खेलका लागि सुरुवाती ११ घोषणा भएको छ ।

प्रशिक्षक अब्दुल्लाह अलमुताइरीले माल्दिभ्सविरुद्ध पहिलो खेलमा जित हासिल गरेको टोलीबाट २ परिवर्तन गरेका छन् । प्रशिक्षक अलमुताइरीले पहिलो खेलको तुलनामा आक्रामक परिवर्तन गरेका हुन् । पछिल्लो खेलबाट दीनेश राजवंशी र सुजल श्रेष्ठको स्थानमा सुमन लामा र विशाल राई टोलीमा आएका छन् ।

नेपालको गोलरक्षक किरण चेम्जोङले टोलीको कप्तानी गर्नेछन् । डिफेन्समा अनन्त तामाङलाई रोहित चन्दले साथ दिनेछन् । अघिल्लो खेलमा रोहितले मिडफिल्डमा खेल्दा दीनेश सेन्टर डिफेन्समा खेलेका थिए । पछिल्लो खेलझैं गौतम श्रेष्ठ र सुमन अर्याल निरन्तर विंगब्याकमा छन् ।

मिडफिल्डमा पुजन उपरकोटी र तेज तामाङले विशाल राईको साथ पाउनेछन् । अघिल्लो खेलमा बेन्चबाट मैदान प्रवेश गरेका विशालले आज सुरुवाती ११ मा स्थान बनाएका हुन् । आक्रमणमा अन्जन विष्ट र नवयुग श्रेष्ठसँगै सुमन लामा अग्रपंक्तिमा छन् । सुमनले आजको खेलमा सुजलको स्थान लिनेछन् ।

राउण्ड रोबिन लिगमा बंगलादेश २ खेलमा ४ अंक जोड्दै अंक तालिकाको शीर्षस्थानमा छ । नेपाल १ खेलमा ३ अंकसहित दोस्रो स्थानमा छ । भारत १ खेलमा १ अंकसहित तेस्रो स्थानमा रहँदा श्रीलंका र माल्दिभ्स अंकविहिन छन् । नेपाल र श्रीलंकाबीच आज राती ९:४५ बजे दोस्रो खेल हुनेछ ।

आज भएको पहिलो खेलमा १० खेलाडीमा सिमित बंगलादेशले भारतलाई बराबरीमा रोकेको थियो । विस्तृतमा यहाँ पढ्नुहोस : भारत १० खेलाडीमा सिमित बंगलादेशसँग बराबरीमा रोकियो