एजेन्सी – एक गोलले पछि परेको ब्राजिलले घरेलु टोलीमाथि पूनरागमन जित निकाल्दै कतार विश्वकप २०२२ को दक्षिण अमेरिकी छनोटमा लगातार नवौं जित निकालेको छ ।

ब्राजिलले एक गोलले पछि परेको अवस्थामा ३–१ को पूनरागमन जित निकालेको हो । भेनेजुएलामा शुक्रबार बिहान भएको खेलमा ब्राजिलको पूनरागमन जितमा माकिन्हस, गाव्रियल बर्बाेसा र एन्थोनीले गोल गरे । घरेलु टोलीका एरिक रामिरेजको गोल सान्त्वना बन्यो ।

खेलको ११औं मिनेटमा एरिक रामिरेजको गोलबाट ब्राजिल खेलमा पछि परेको थियो । उनले यफर्सन सोटेल्डोको पासमा गोल गरेका थिए । एक गोलले पछि परेको ब्राजिलले घरेलु टोलीलाई लगातार दवावमा राखेपनि गोलको लागि दोस्रो हाफ नै कुर्नुपरेको थियो । ७१औं मिनेटमा सब्सिच्युट फरवार्ड राफिन्हाको पासमा डिफेन्डर मार्किन्हसले गोल गर्दै खेललाई १–१ गोलको बराबरीमा ल्याए ।

८५औं मिनेटमा गाव्रियल बर्बाेसाले पेनाल्टीमा गोल गर्दै ब्राजिललाई २–१ को अग्रता दिलाए । भिनिसियस जुनियरको प्रहारलाई भेनेजुएलाका गोलरक्षक जोएल ग्राटेरोलले नियन्त्रणमा लिन नसकेको बलमा नजिकै रहेका गाव्रियल बर्बाेसालाई ओस्कार गोन्जालेजले फल गर्न पुगेपछि रेफ्रीले ब्राजिललाई पेनाल्टी प्रदान गरेको थियो । जसमा बर्बाेसा चुकेनन् ।

इन्ज्युरी समयको थप गरिएको पाँचौ मिनेटमा अर्काे वैकल्पिक खेलाडी एन्थोनीले गोल गर्दै ब्राजिलको जित पक्का गरे । ७७औं मिनेटमा गाब्रियल जेससको स्थानमा मैदान छिरेका एन्थोनीले राफिन्हाकै पासमा गोल गर्न सफल भए ।

जितपछि अपराजित रहेको ब्राजिल ९ खेलबाट २७ अंक जोडेर शीर्षस्थानमा रहेको छ । पराजित भेनेजुएला ४ अंक जोडेर पुछारमा रहेको छ ।