काठमाडौं (हाम्रो खेलकुद) – साफ च्याम्पियनसिप २०२१ अन्तर्गत घरेलु टोली माल्दिभ्सले चौथो चरणको पहिलो खेलमा श्रीलंकालाई पराजित गरेको छ । आइतबार माल्दिभ्सको मालेस्थित राष्ट्रिय रंगशालामा श्रीलंकालाई १-० ले हराउँदै माल्दिभ्सले फाइनल पुग्ने सम्भावना बलियो बनाएको छ ।

माल्दिभ्सको जितमा पूर्वकप्तान अलि अश्फाकले एकमात्र गोल गरे । उनले खेलको छैटौं मिनेटमा हेडरमार्फत गरेको गोल नै निर्णायक सावित भयो । यसअघि पहिलो खेलमा नेपालसँग १-० ले पराजित भएको माल्दिभ्सले दोस्रो खेलमा बंगलादेशलाई २-० ले पराजित गरेको थियो । यस हारले भने श्रीलंका प्रतियोगितामा १ अंक जोड्दै बाहिरिएको छ ।

यस नतिजाले साफ च्याम्पियनसिपमा भारतको फाइनल पुग्ने समीकरणमा भने घाटा पुगेको छ । माल्दिभ्सको जितले नेपाललाई पनि फाइनल पुग्न केहि कठिनाइ हुन सक्छ । भारतले अब नेपाललाई पराजित गरे अन्तिम खेलमा माल्दिभ्समाथि पनि जित हासिल गर्नुपर्ने समीकरण आउनेछ ।

नेपालले पनि अब फाइनल पुग्न भारतविरुद्ध बराबरी खेलेर अर्को खेलमा बंगलादेशसँग अंक जोड्नुपर्छ । भारतसँग बराबर भएर बंगलादेशसँग पराजित भए, नेपालका लागि अर्को खेलमा भारतले जित वा बराबरी खेल्नुपर्ने हुन्छ । नेपालले आज भारतलाई हराए भारत बाहिरिनेछ भने नेपाल फाइनलमा पुग्नेछ ।

अंक तालिकामा नेपाल २ खेलमा ६ अंक जोड्दै शीर्षस्थानमा छ । माल्दिभ्सले ३ खेलमा ६ अंक जोडेको छ । बंगलादेश ३ खेलमा ४ अंक तथा भारत २ खेलमा २ अंक जोड्दै तेस्रो र चौथो स्थानमा छन् । श्रीलंका ४ खेलमा १ अंक जोड्दै बाहिरिएको छ ।