काठमाडौं (हाम्रो खेलकुद)– प्रधानमन्त्री शेरबहादुर देउवाले पहिलोपटक साफ च्याम्पियनसिपको फाइनल पुग्न सफल नेपाली फुटबल टोलीलाई बधाई दिएका छन् । माल्दिभ्समा जारी च्याम्पियनसिपमा राउन्ड रोविनको आफ्नो अन्तिम खेलमा बंगलादेशसँग १–१ को बराबरी खेल्दै नेपाली टोली उपाधि नजिक पुगेको हो ।

प्रधानमन्त्री देउवाले बुधबार साँझ सामाजिक ट्विट गर्दै नेपाली टोलीलाई बधाई दिएका हुन् । उनले फाइनलका लागि पनि शुभेच्छा दिएका छन्।
उनले लेखेका छन्, ‘साफ फुटबल प्रतियोगिताको फाइनलमा पुगेको नेपाली फुटबल टोलीका सम्पूर्ण खेलाडी, प्रशिक्षक तथा अफिसियलहरुलाई बधाई तथा आगामी खेलको लागि शुभेच्छासहित प्रोत्साहन दिन चाहन्छु ।’

पहिलो २ खेलमा माल्दिभ्सलाई १–० र दोस्रो खेलमा श्रीलंकालाई ३–२ ले हराएको नेपाल तेस्रो खेलमा भारतसँग १–० पराजित भएको थियो । फाइनल पुग्न बराबरी खेल्नु पर्ने नेपालको बाध्यता थियो । खेलको आठौं मिनेटमै पछि परेको नेपालका लागि खेलको अन्त्यतिर अन्जन विष्टले पेनाल्टीमा बराबरी गोल फर्काएका थिए । सन् १९९३ मा सुरु भएको च्याम्पियनसिपमा नेपाल पहिलो पटक फाइनल पुग्न सफल भएको हो ।

हार्दिक बधाई तथा शुभकामना !

साफ फुटवल प्रतियोगिताको फाइनल प्रतिस्पर्धामा पुगेको नेपाली फुटवल टोलीका सम्पुर्ण खेलाडी, प्रशिक्षक तथा अफिसियलहरुलाई बधाई तथा आगामी खेलको लागि सुभेच्छा सहित प्रोत्साहन दिन चाहान्छु ।

— Sher Bahadur Deuba (@SherBDeuba) October 13, 2021