एजेन्सी – सुपरस्टार फरवार्ड नेयमारले एक गोलसँगै दुई असिस्ट दिएपछि ब्राजिलले फिफा विश्वकप कतार २०२२ को दक्षिण अमेरिकी छनोटमा उरुग्वेमाथि सानदार जित निकालेको छ ।

घरेलु मैदानमा ब्राजिलले उरुग्वेमाथि ४–१ को सानदार जित निकालेको हो । ब्राजिलको जितमा राफिन्हाले दुई तथा नेयमारले एक गोल गरे । उरुग्वेका लुइस सुआरेजले एक गोल फर्काए । खेलको ११औं मिनेटमा नेयमारले गोल गर्दै ब्राजिललाई अग्रता दिलाए । उनले फ्रेडको पासमा गोल गरेका थिए ।

१९औं मिनेटमा राफिन्हाले गोल गर्द ब्राजिलको अग्रता दोब्बर पारे । नेयमारको प्रहारलाई गोलरक्षक फर्नान्डो मुसलेराले बचाएपनि रिवाउन्डमा राफिन्हाले गोल गर्न सफल भएका थिए ।

३६औं मिनेटमा रोड्रिगो बेन्टानकरले प्रज्ञज्ञहार पोस्ट नजिकैबाट बाहिरिदा उरुग्वेले गोल अन्तर कम गर्न सकेन । ४०औं मिनेटमा नेयमारको प्रहारलाई गोलरक्षक मुस्लेराले उत्कृष्ट बचाउ गर्दै उरुग्वेको गोल अन्तर टारे । ५६औं मिनेटमा एडिन्सन काभनीले गोल गरेपनि उनी आफसाइड ठहरिदा उरुग्वेले गोल अन्तर कम गर्न सकेन ।

५९औं मिनेटमा राफिन्हाले व्यक्तिगत दोस्रो तथा टोलीका लागि तेस्रो गोल गर्दै ब्राजिलाई ३–० ले अघि बढाए । राफिन्हाले नेयमारको पासमा गोल गरेका थिए । ६५औं मिनेटमा एन्थोनीको पासमा गाब्रियल बर्बाेसाको प्रहारलाई मुस्लेराले बचाए ।

७७औं मिनेटमा लुइस सुआरेजले गोल गर्दै खेललाई ३–१ को अवस्थामा ल्याए । उनले २५ यार्डमा प्राप्त फ्रिकिकलाई सिधै गोलमा परिणत गर्दा ब्राजिली गोलरक्षक इडर्सन मोराएसले रोक्ने कुनै अवसर नै पाएन । ८५औं मिनेटमा वैकल्पिक फरवार्ड गाब्रियल बर्बाेसाले गोल गर्दै ब्राजिलको जित पक्का गरे । उनले नेयमारको पासमा गोल गरेका थिए ।

यो जितपछि छनोटमा अपराजित रहेको ब्राजिल ११ खेलबाट ३१ अंक जोडेर शीर्षस्थानमा यथावत रहँदै विश्वकपको छनोट नजिक पुगेको छ । पराजित उरुग्वे १२ खेलबाट १६ अंक जोडेर पाँचौं स्थानमा रहेको छ ।

अर्काे खेलमा चिलीले भेनेजुएलालाई ३–० ले पराजित गरेको छ । चिलीको जितमा इरिक पुल्गरले दुई तथा बेन ब्रेरेटनले एक गोल गरे । जितपछि चिली १२ खेलबाट १३ अंक जोडेर छैटौ स्थानमा रहेको छ । पराजित भेनेजुएला ७ अंक जोडेर पुछारमा रहेको छ ।