एजेन्सी – फ्रान्सेली फरवार्ड एन्टोइन ग्रिजमन नायकबाट खलनायक बन्दा इंग्लिस क्लब लिभरपुलले स्पेनिस क्लब एट्लेटिको म्याड्रिडमाथि रोमाञ्चक जित निकालेको छ ।

लिभरपुलले १० खेलाडीमा समेटिएको घरेलु टोलीमाथि ३–२ को रोमाञ्चक जित निकालेको हो । लिभरपुलको रोमाञ्चक जितमा मोहम्मद सलाहले दुई तथा नावी केइटाले गोल गरे । एट्लेटिकोका लागि दुवै गोल ग्रिजमनले गरेका थिए ।

वान्डा मेट्रोपोलिटानोमा मंगलबार राति भएको खेलको आठौं मिनेटमा मोहम्द सलाहको गोलबाट लिभरपुलले अग्रता लिएको थियो । १३औं मिनेटमा नावी केइटाले गोल गर्दै लिभरपुलको अग्रता दोब्बर पारे ।

त्यसपछि २०औं मिनेटमा एन्टोइन ग्रिजमनले कोकीको पासमा गोल गर्दै खेललाई २–१ को अवस्थामा ल्याए । ३४औं मिनेटमा ग्रिजमनले जोआओ फेलिक्सको पासमा व्यक्तिगत दोस्रो गोल गर्दै खेललाई २–२ गोलको बराबरीमा ल्याउँदै एट्लेटिकोलाई खेलमा फर्काए ।

बराबरी गोल गरेका ग्रिजमन दोस्रो हाफमा खलनायक बनेपछि घरेलु टोली समस्यामा परेको थियो । ५२औं मिनेटमा बल खोस्ने क्रममा रोबर्टाे फिर्मिनोलाई खुट्टाले टाउकोमा प्रहार गरेपछि रेफ्रीले उनलाई सिधै रातो कार्ड दिदै मैदान बाहिर पठाएको थियो । ७८औं मिनेटमा मोहम्मद सलाहले व्यक्तिगत दोस्रो तथा टोलीका लागि तेस्रो गोल गर्दै लिभरपुललाई ३–२ को रोमाञ्चक जित दिलाए ।

जितपछि अपराजित रहेको लिभरपुल ३ खेलबाट ९ अंक जोडेर शीर्षस्थानमा रहेको छ । समूहमा पहिलो हार बेहोरेको एट्लेटिको ४ अंक जोडेर दोस्रो स्थानमा यथावत रहेको छ ।

यही समूह ‘बी’ को अर्काे खेलमा पोर्चुगिज क्लब एफसी पोर्टाेले इटालियन क्लब एसी मिलानलाई १–० ले पराजित गरेको छ । पोर्टाेको जितमा दोस्रो हाफमा लुइस डियासले गरेको गोल नै निर्णायक बन्यो । जितपछि पोर्टाे ४ अंक जोडेर तेस्रो स्थानमा रहेको छ । लगातार तेस्रो हार बेहोरेको मिलान अंकविहीन हुदै पुछारमा छ ।