काठमाडौं (हाम्रो खेलकुद)– समूह चरणमा लगातार दोस्रो जित निकाल्दै भनिमन्डल भेट्रान क्लब मेयर कप भेट्रान्स फुटबल प्रतियोगिताको क्वाटरफाइनलमा प्रवेश गरेको छ । त्रिपुरेश्वरस्थित दशरथ रंगशालामा सोमबार भएको खेलमा भनिमण्डलले बि आर ब्रदर्शलाई १–० ले हराएको थियो ।

समूह ‘बी’ बाट भनिमण्डलको त्यो लगातार दोस्रो जित हो । टोली समूहबाट अन्तिम आठमा पुग्न सफल भएको छ । भनिमण्डलको जितमा पूर्व राष्ट्रिय खेलाडी प्रदिप महर्जनले ५८औं मिनेटमा गरेको गोल नै निर्णायक बन्यो । भनिमण्डलले आफ्नो पहिलो खेलमा न्युरोड टिम (एनआरटी) लाई २–० ले हराएको थियो ।

यस्तै अर्काे खेलमा फर्पिङ स्पोर्टस डेभलपमेन्टले फुटबल फेलोसिपलाई ११–० को भारी अन्तरले पराजित गर्दै विजयी सुरुवात गरेको छ । फर्पिङको जितमा निरज श्रेष्ठले ४ गोल गर्दा गणेश लावतीले ह्याट्रिक पूरा गरे । नर कुमार राईले २ गोल तथा अनिल गुरुङ र सल्यान खड्गीले समान १ गोल गरे । लगातार दोस्रो हारसँगै फुटबल फेलोसिप प्रतियोगिताको समूह चरणबाटै बाहिरिएको छ । फुटबल फेलोसिपले पहिलो खेलमा नेपाल आर्मी भेट्रान्स क्लबसँग ७–१ को हार बेहोरेको थियो ।

त्यस्तै सोमबार अर्को खेलमा एसएनकेसीले बौद्ध भेट्रान्सलाई ४–० ले पराजित गरेको छ । एसएनकेसीको जितमा पूर्व राष्ट्रिय खेलाडी सुरेन्द्र तामाङले २ तथा रमेश सिन्केमान र बिभोर गुरुङले समान १ गोल गरे ।

प्रतियोगिताको विजेता टोलीले ५ लाख तथा दोस्रो हुने टोलीले २ लाख ५० हजार रुपैयाँ प्राप्त गर्नेछ । कात्तिक १६ गते सम्म चल्ने प्रतियोगितामा सहभागी २१ टोलीलाई ७ समूहमा विभाजन गरिएको छ ।

हरेक समूहको शीर्ष टोलीसँगै ७ समूहको उपविजेतामध्ये एक उत्कृष्ट टोली क्वाटरफाइनलमा पुग्नेछन् । प्रतियोगितामा ४० वर्षमाथिको खेलाडी हुनुपर्नेछ । ३ जना ३५ वर्षमाथिको खेलाडी राख्न पाउने प्रावधान आयोजकले तय गरेको छ ।