एजेन्सी – बार्सिलोनाका युवा स्टार अन्सु फातीले ला लिगामा लगातार दोस्रो खेल गुमाउने भएका छन् । अलाभेजसँग शनिबार हुने खेलमा फाती हुने छैनन् । साताको मध्यममा रायो भालेसानोविरुद्धको खेलमा पनि दायाँ घुँडाको चोट कारण फातीले खेलेनन् ।

त्यसअघि रियल म्याड्रिडविरुद्धको एल क्लासिकोका दौरान डेभिड अल्भासँग ठोक्किदा उनको घुँडामा चोट लागेको थियो । जसका कारण ७४ औं मिनेटमा उनको ठाँउमा सर्जियो अगुएरोलाई मैदान प्रवेश गराइएको थियो । अगुएरोले बार्सिलोनाका लागि गोल गरेपछि एल क्लासिकोमा रियल २–१ ले विजयी भएको थियो ।

चोटका कारण झण्डै एक वर्ष मैदान बाहिर रहेका फाती केहि साता अघिबाट मात्र मैदान फर्केका हुन् । लामो समयपछिको पूनरागमन गर्दा फातीले पुरानै लयको झल्को दिएका थिए । उनले सुरुवाती दुई खेलमा नै गोल गरेका थिए । बार्सिलोनाले फाती मंगलबार डेनोमो किभविरुद्ध हुने च्याम्पियन्स लिगको समूह चरणमा भने फर्कने अपेक्षा गरेको छ ।

डेम्बेले खेल्छन् ?

ओसमानो डेम्बेलेले चोटका कारण यो सिजन खेलेका छैनन् । ह्यामस्ट्रिङ समस्याका कारण उनी लामो समयदेखि मैदान बाहिर रहँदै आएका छन् । गत मेमा इल्बारविरुद्ध उनले पछिल्ले पटक खेलेका थिए । यो साता प्रशिक्षणमा फर्केका डेम्बेले शनिबारको खेलाडीको सुचीमा रहन सक्छन् ।

यद्दपी बार्सिलोना उनको चोटलाई लिएर सचेत छ । विगतमा पनि चोट कारण उनी पटक पटक मैदान बाहिर रहँदै आएका छन् । बार्सिलोनका अन्तरिमक प्रशिक्षक सर्जी बार्जुआनले बार्सिलोना बीका युवा खेलाडी एब्डे इजालजोली र अल्भारो सान्जलाई पहिलो टोलीको अभ्यासमा बोलाएका छन् ।