काठमाडौं (हाम्रो खेलकुद)– ताजिकिस्तानमा रहेको नेपाली युवा टोली सुखद अन्त्यको अपेक्षाका साथ आइतबार लेवनानविरुद्ध उत्रनेछ । एएफसी यू २३ को समूह चरणमा प्रतिस्पर्धा गर्न गएको नेपाली टोलीले सुरुवाती दुई खेलमा पराजय भोगेको थियो ।

नेपाल र लेबनानबीचको खेल आइतबार दिउँसो ४ः४५ बजे रिपलिब्लकन सेन्ट्रल स्टेडियममा सुरु हुनेछ । नेपाल मात्र होइन लेबनानले पनि अघिल्ला दुवै खेल गुमाइसकेको छ । त्यसअर्थ समूह चरणको अन्तिम खेल दुवै टोलीका लागि प्रतिष्ठाको लडाइन हुनेछ ।
इरानसँगको पहिलो खेल ४–० ले गुमाएको नेपालले आयोजक ताजिकिस्तानसँग ६–० ले पराजित भएको थियो । समूह बीमा नेपाल र लेबनान अंकविहिन छन् । समान ६ अंक जोेडेका ताजिकिस्तान शीर्षस्थान र इरान दोस्रो स्थानमा छ ।

समूहको शीर्ष टोली सिधै अन्तिम चरणमा छनोट हुँदा दोस्रो स्थान हासिल गर्ने उत्कृष्ट चार टोली पनि अघि बढ्नेछन् । नेपालले हालसम्म एएफसीको यू–२३ एसियन कप प्रतियोगिताको छनोट चरण पार गर्न सकेको छैन । पछिल्लो दुई संस्करणमा नेपाली टोली जितविहिन हुँदै छनोटबाट घर फर्केको थियो । दुवै संस्करणमा नेपालले गोल गर्न सकेको थिएन ।

प्रतियोगिताको पाँचौ संस्करणमा आइपुग्दा इराक, जापान, उज्बेकिस्तान र दक्षिण कोरियाले १–१ पटक उपाधि जितेका छन् । साविक विजेता दक्षिण कोरिया सन् २०१६ मा उपविजेता समेत रहेको थियो । गत संस्करणमा पराजित साउदी अरेबिया भने २०१३ मा भएको पहिलो संस्करणमा पनि फाइनलमा हारेको थियो ।