बेलबारी (हाम्रो खेलकुद) – ए डिभिजन क्लब एपिएफ चौथो अन्तर्राष्ट्रिय आमन्त्रण बेलबारी गोल्ड कप फुटबल प्रतियोगिताको फाइनल पुगेको छ । रारा फुटबल क्लब राजारानीलाई मंगलबार २–० ले हराउँदै एपिएफ उपाधि नजिक पुगेको हो ।

एपिएफले उपाधिका लागि बुधबार अर्को ए डिभिजन टोली हिमालयन शेर्पा क्लबको सामना गर्नेछ । मोरङको लक्ष्मीमार्गमा जारी प्रतियोगितामा एपिएफलाई जित दिलाउन आशिष लामा र नवीन लामाले गोल गरे । दुवै गोल दोस्रो हाफमा सम्भव भएको थियो ।

७५ औं मिनेटमा आशिषको पेनाल्टी गोलबाट एपिएफले खेलमा अग्रता लिएको थियो । राराका विकु तामाङले पेनाल्टी बक्स भित्र बल ह्यान्ड गरेपछि रेफ्री विक्रम कार्कीले एपिएफलाई पेनाल्टी दिएका थिए । जसमा आशिषले गोल गरे । खेल सकिन ६ मिनेट बाँकी रहँदा नवीनले गोल गर्दै टोलीको जित पक्का गरे ।

एपिएफका सनिश श्रेष्ठ खेलको म्यान अफ दी म्याच घोषित भएर उनले ५ हजार ५ सय रुपैयाँ प्राप्त गरे । प्रदेश १ का सांसद लोकप्रसाद संग्रौलाले सनिशलाई पुरस्कृत गरे ।

होटुबोर्ग प्रायोजक रहेको प्रतियोगिताको मुख्य सहयोगमा बेलबारी नगरपालिका, सह प्रायोजकमा लक्ष्मी सामुदायिक वन, बेलबारी नगरपालिकाका सबै वडा, सहयोगीमा मल्टीमिशन ट्रेनिङ सेन्टर धरान तथा प्राविधिक सहयोग मोरङ जिल्ला फुटबल संघ रहेको छ ।

प्रतियोगिताको विजेताले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । त्यस्तै प्रतियोगिताको सर्वोत्कृष्ट खेलाडीले ३१ हजार, सर्वाधिक गोलकर्ताले २१ हजार, विधागत उत्कृष्ट खेलाडीले समान ११ हजार तथा हरेक खेलको म्यान अफ दी म्याचले ५ हजार ५ सय रुपैयाँ प्राप्त गर्ने आयोजक क्लबले जनाएको छ ।