काठमाडौं (हाम्रो खेलकुद) – टिशा महर्जन र प्रारम्भ भण्डारी दोश्रो जुनियर अक्वाथलनको यु १६ तर्फको उपाधि जितेका छन् । प्रतियोगिताको २०० मिटर दौड, ४०० मिटर पौडी र १०० मिटर दौडको दुरी महिला तर्फ २४ मिनेट ५६ सेकेन्डका साथ टिशाले र पुरुषतर्फ २३ मिनेट ५४ सेकेन्डका साथ प्रारम्भले पहिलो स्थान हात पारेका हुन् ।

महिलातर्फ आजमी श्रेष्ठ दोश्रो, रोशा न्यौपाने तेश्रो तथा स्वस्तिका भण्डारीले चौथो स्थान हासिल गरे । पुरुषतर्फ तेन्जिङ रायन गुरुङ दोस्रो तथा जादेन श्रेष्ठ तेस्रो भए । सनिल थापा मगर चौथो र अजल काजी ताम्राकार पाँचौ भए । पहिलो स्थान हात पार्ने खेलाडीहरुले नगद ५ हजार रुपैयाँ हात पारे । दोश्रोले ३ हजार, तेश्रोले २ हजार तथा चौथो र पाँचौले समान १ हजार पाए ।

नेपाल ट्राईयाथलन संघको आयोजना तथा लिटिल डलफिन स्वीम स्कुलको सहआयोजनामा सातदोवाटोस्थित अन्तर्राष्ट्रिय खेल परिसरमा भएको प्रतियोगिताको यु–१३ महिलातर्फ आर्या महर्जन पहिलो भईन् । उनले ३२ मिनेट ३९ सेकेन्डका साथ उक्त दुरी पुरा गरिन् ।

आश्ना श्रेष्ठ दोस्रो तथा आकंक्षा श्रेष्ठ तेस्रो भइन् । पुरुषतर्फ आरोहण भण्डारीले २५ मिनट ३८ सेकेन्डका साथ पहिलो भए । अथर्व सिंह दोस्रो तथा प्रसर्य श्रेष्ठ तेस्रो भए ।

पहिलो भएकाले ५ हजार, दोस्रोले ३ हजार तथा तेस्रोले २ हजार पाए । यु–१० तर्फ एक मात्र सानी खेलाडी ज्योत्सना भट्टले प्रतियोगितामा सहभागिता जनाए बापत सान्त्वना बापत नगद १ हजार प्राप्त गरिन् ।

बिजयी खेलाडीलाई युवा तथा खेलकुद मन्त्री महेश्वरजंग गहतराज ‘अथक’ र नेपाल ट्राईयाथलन संघका अध्यक्ष एवं नेपाल ओलम्पिक कमिटिका महासचिव निलेन्द्र राज श्रेष्ठले पुरस्कृत गरे । प्रतियोगितामा २५ खेलाडीहरुको उपस्थिती रहेको थियो ।