काठमाडौं (हाम्रो खेलकुद) – तीव्र गतिका बलर करण केसी त्रिकोणात्मक टि२० आई सिरिजमा पपुवा न्युगिनीविरुद्ध प्लेयर अफ द म्याच चुनिएका छन् । पपुवा न्युगिनीलाई ३७ रनले हराउँनेक्रममा करण नेपालबाट ५ विकेट लिने र ह्याट्रिक गर्ने पहिलो खेलाडी बनेका थिए ।

२ सय ४ रनको विशाल विजयी लक्ष्य पछ्याएको पपुवा न्युगिनी १९.४ ओभरमा १ सय ६६ रनमा अल आउट भयो । पपुवा न्युगिनीका लागि चाल्र्स अमिनीले ४७ बलमा ९ चौकासहित सर्वाधिक ६२ रनको योगदान दिए ।

नेपालका करण केसीले ३.४ ओभरमा २१ रन खर्चेर ५ विकेट लिए । करणले २० औं ओभरमा ह्याट्रिक र पाँच विकेट लिँदै दुई कीर्तिमानी योगदान दिए ।

करणले २० औं ओभरको दोस्रो बलमा चाद सोपारलाई २ रनमा रोहित पौडेलबाट थर्डमा क्याच गराए । तेस्रो बलमा विकेटकिपर शिमोन आतीलाई बोल्ड गरे । चौथो बलमा नोसैन पोकनालाई मिडअफमा दीपेन्द्रबाट क्याच गराउँदै नेपालबाट पाँच विकेट लिने र ह्याट्रिक गर्ने दुबै पहिलो खेलाडी बने ।

टोनी उरा ४३, सेसे बाउ २५ र नोर्मन भानुआले १७ रन बनाए । अभिनाश बोहराले ४ ओभरमा ३४ रन खर्चेर २ विकेट लिए । सोमपाल कामीले ४ ओभरमा ३४ रन खर्चेर २ विकेट लिए । सन्दीपको नाममा १ विकेट रह्यो ।

त्यसअघि टियु क्रिकेट मैदानमा टस हारेर पहिला ब्याटिङ थालेको नेपालले निर्धारित २० ओभरमा ७ विकेट गुमाउँदै २ सय ३ रन बनाएको थियो । नेपालका दीपेन्द्रसिंह ऐरीले ३३ बलमा ३ चौका र ४ छक्कासहित सर्वाधिक ६६ रन बनाए । डेब्यू खेल खेलेका आदिल अन्सारीले ११ बलमा १ चौका र ३ छक्कासहित ३३ रनको विष्फोटक इनिङ खेले ।

युवा ब्याटर रोहित पौडेल २३ बलमा ४ चौका र २ छक्कासहित ४१ रनमा आउट भए । पपुवा न्युगिनीका राइली हेकुरेले ४ ओभरमा २२ रन खर्चेर २ विकेट लिए । आबुआ मोरेआले ४ ओभरमा २९ रन खर्चेर ३ विकेट लिए ।

नेपाल ३ खेलमा ६ अंकका साथ फाइनलमा पुगि सकेको छ । नेपालले अन्तिम खेल शनिबार मलेसियासँग खेल्नेछ । फाइनल सोमबार हुनेछ । शुक्रबार पपुवा न्युगिनी र मलेसियाबीच खेल हुनेछ । मलेसिया विजयी भएमा स्वत फाइनलमा पुग्नेछ । पराजित भएमा नेपालसँगको खेलपछिको नतिजामा निर्भर रहनेछ ।

यो पनि : करण ह्याट्रिक र पाँच विकेट लिने पहिलो नेपाली खेलाडी