काठमाडौं (हाम्रो खेलकुद) – काभा नेसन्स लिगको तयारीमा रहेको नेपाली महिला राष्ट्रिय भलिबल टोलीले रसियन टोलीसँग अर्काे हार बेहोरेको छ । यससँगै नेपालले दुई मैत्रीपुर्ण खेलकाे सिरिज रसियालाई २–० ले सुम्पिएकाे छ ।

सोमबार भएको दोस्रो खेलमा नेपाल ३–० को सोझो सेटमा पराजित हुन पुग्यो । यसअघि आइतबार भएको पहिलो खेलमा पनि नेपालले ३–० कै सोझो सेटमा नै हार बेहोरेको थियो ।

त्रिपुरेश्वरस्थित राष्ट्रिय खेलकुद परिषदको कभर्डहलमा सोमबार भएको खेलको पहिलो सेट सम्झन लायक हुन सकेन । नेपालले पहिलो सेट २५–१४ ले गुमायो ।

दोस्रो सेटमा नेपालले अन्त्यतिर बलियो चुनौती दिदै पुनरागमनको प्रयास गरेपनि नतिजा २५–२३ ले सुम्पन पुग्यो । तेस्रो सेटमा पनि नेपालले रसियालाई बलियो चुनौती पेश गरेपनि नतिजा आफ्नो पक्षमा पार्न सकेन । नेपाल तेस्रो सेटमा २५–२२ ले पराजित हुन पुग्यो ।

तुलनात्मक रुपमा बलियाे र अग्ला कदका रसियाविरुद्ध नेपालले स्पाइक र ब्लकमै अंक जाेड्दै नेपालमै आयाेजा हुन लागेकाे काभा नेसन्स लिगकाे लािग तयार रहेकाे संकेत दिएकाे छ ।

बलियो रसियाविरुद्धको दोस्रो खेलमा नेपालकी सरस्वती चौधरीले उच्च प्रदर्शन गरेपनि टोलीलाई जिताउन सकिनन् । नियमित स्पाइकर निरुता ठगुन्नाले प्रदर्शन फितलो हुँदा अवसर पाएकी आरती सुवेदीले आँफुलाई प्रमाणित गरिन् ।

नेपालस्थित रसियाको दूतावासको विशेष सहयोगमा नेपाल भलिबल संघले मैत्रीपूर्ण खेल आयोजना गरेको हो । अब नेपाली टोली काभा नेसन्स लिगको लागि तयारीमा जुट्नेछ ।

काभा नेसन्स लिग साउन १७ गतेदेखि काठमाडौंमा सुरु हुदैछ । काभा नेसन्स लगमा आयोजक नेपालसँगै भारत, इरान, श्रीलंका र माल्दिभ्सले सहभागिता रहनेछ ।