एजेन्सी – साफ यू-२० च्याम्पियनसिप २०२४ अन्तर्गत उद्घाटन खेलको पहिलो हाफमा नेपालले श्रीलंकाविरुद्ध अग्रता लिएको छ ।

सातदोबाटोस्थित एन्फा कम्प्लेक्समा खेलको अधिकांश समय बल पोसेसनमा नियन्त्रण लिएको नेपालले मध्यतिर अग्रता लिएको थियो । आक्रमक फुटबलमा जोड दिएको नेपालले पटक पटक गोलको अवसर पनि सिर्जना गरेको छ ।

ए डिभिजनको अनुभव बोकिसकेका फरवार्ड निराजन धामीले नेपाललाई अग्रता दिलाएका हुन् । श्रीलंकाले खासै प्रभाव जमाउन सकेको छैन भने पहिलो हाफमै २ खेलाडी परिवर्तन गरिसकेको छ ।

खेलको दोस्रो मिनेटमै नेपालको अग्रता लिने प्रयासमा अफसाइड बाधक बन्यो । अभिनाश स्याङतानको फ्रिकिकमा निराजन धामीको प्रयास गोल भएपनि सहायक रेफ्रीले अफसाइडका लागि झन्डा उठाए ।

खेलको २४ औं मिनेटमा निराजनले नै नेपाललाई अग्रता दिलाए । समिर तामाङले थ्रो इन बाट आएको बललाई पेनाल्टी क्षेत्रभित्र खेक्दा श्रीलंकाली डिफेन्डरले क्लियर गर्न सकेनन् । त्यसै बललाई नियन्त्रणमा लिँदै निराजनले सुन्दर फिनिस गरे ।

पहिलो हाफको इन्ज्युरी समयमा श्रीलंकाका मिहम्द थिल्हमले गरेको प्रहार नेपालका गोलरक्षक जियारत शेखले बचाए ।

६ राष्ट्र सम्मिलित प्रतियोगितामा नेपाल समूह ए मा छ । समूह ए मा नेपाल सहित बंगलादेश र श्रीलंका रहेका छन् । समुह बी मा भारत, माल्दिभ्स र भुटान रहेका छन् ।