चितवन (हाम्रो खेलुकद) – पाँचौ संस्करणको चितवन च्याम्पियनसिप कप फुटबल प्रतियोगिता यही शुक्रबारदेखि हुने भएको छ ।
एभरेष्ट क्लव चितवनले पत्रकार सम्मेलनको आयोजना गर्दै प्रतियोगिताको पाँचौ संस्करण शुक्रबारदेखि शुरु हुने र प्रतियोगितामा देशभरका १६ टोलीको सहभागिता रहने जानकारी गराएको छ ।
च्याम्पियनसिप जुनियर प्रहरी अधिकृत शिक्षालयको खेल मैदानमा जेठ २४ देखि असार ७ गते सम्म हुने छ । क्लवका अध्यक्ष अशोक देवकोटाले जिल्लावाहिरका ८ टिमसहित कुल १६ टिमको सहभागिता रहेको जानकारी गराए ।
प्रतियोगितालाई हानामी इन्टरनेशनल एजुकेशनले पाँच वर्षसम्मको लागि मुख्य प्रायोजन गरेको छ । यससँगै च्याम्पियनसिप ‘हानामी चितवन च्याम्पियनसिप कप’ का नामले सञ्चालन हुनेछ ।
प्रतियोगितामा सेन्ट्रल कलेज भरतपुर फुटवल क्लव र गैडाकोटसहित नारायणगढ फुटवल क्लव, राप्ती रिभर फुटवल क्लव, नारायणी मोटर्स युनिक फुटवल क्लव, जुनियर प्रहरी अधिकृत शिक्षालय भरतपुर, सशस्त्र प्रहरी वल भण्डारा, जु फुटवल क्लव जुगेडी, हर्दी युवा समाज भण्डारा, भैरव स्पोर्टस क्लव नवलपरासी, रामपुर फुटवल क्लव, सुनधारा फुटवल क्लव, वसन्तपुर युनाईटेड क्लव माडी, देशभक्त फुटवल क्लव, हानामी एभरेष्ट क्लव र अभिषेक चर्च नवलपरासीले सहभागीता जनाउनेछन् ।
च्याम्पियनसिपको च्याम्पियनले ३ लाख रुपैया हात पार्नेछ । दोस्रोले १ लाख ५० हजार तथा तेस्रो ले ५० हजार रुपैया प्राप्त गर्ने छन् । प्रतियोगिताको उत्कृष्ट खेलाडीले २० हजार तथा सर्वाधिक गोलकर्ता, उत्कृष्ट मिडफिल्डर, डिफेन्डर र गोलरक्षकले जनही १० हजार रुपैया पाउनेछन् ।
नकआउटका आधारमा हुने प्रतियोगिताको उद्घाटन खेलमा सेन्ट्रल कलेज भरतपुर फुटवल क्लव र फोर ब्रदर्स गैडाकोटबीच प्रतिस्पर्धा हुनेछ । गैडाकोट गत वर्षको च्याम्पियन हो ।
