काठमाडौं (हाम्रो खेलकुद) – कास्कीका असिम शेरचन र विभागीय त्रिभुवन आर्मी क्लबकी आइसा तामाङ राजधानीमा शुक्रबारबाट शुरु भएको लक्ष्मी कुमार श्रेष्ठ मेमोरियल छैटौ इन्डोर राष्ट्रिय आर्चरी च्याम्पियनसिपको फाइनलमा प्रवेश गरेका छन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको खेलमा असिम पुरुषतर्फको रिकर्भ मेन्स इन्डिभिजुअलको तथा आइसा रिकर्भ महिला इन्डिभिजुअलको फाइनलमा प्रवेश गर्न सफल भएको हो । पुरुषतर्फ रोशन नगरकोटी र महिलामा मित्र राईले फाइनलमा स्थान बनाए ।

कास्कीका असिम शेरचनले पुलिसका खुम कुमाललाई ६–४ मा हराए । आर्मीका रोशनले पुलिसका प्रेम प्रसाद पुनलाई ६–० मा हराए । महिलामा आर्मीकी आइसा तामाङले कास्कीकी विष्णुमाया लिम्बुलाई ७–१ म हराइन् । यस्तै अर्काे सेमिफाइनलमा मित्रा राईले कास्कीकी रश्मी दर्लामीलाई ६–४ ले हराइन् ।

रिकर्भ मेन्स टिममा आर्मी र नेपाल मगर समाजले फाइनलमा भेट पक्का गरे । आर्मीले कास्कीलाई ६–४ ले तथा नेपाल मगर समाजले पुलिसलाई ६–२ ले हारए ।

कम्पाउन्ड मेन्स एण्ड वुमन्समा राजधानी दैनिकका सनातन मल्लले कास्कीका योगेन्द्र शेरचनलाई १ स्कोरमा हराउदै फाइनलमा स्थान बनाए । सनातनले १३७ र योगेन्द्रले १३६ अंक जोडे । अर्काे सेमिफाइनलमा बेस्टका प्रसाद आचार्यले थसाङ स्पोर्टस् क्लबका रमेश भट्टचनलाई पराजित गर्दै फाइनलमा पुग्न सफल भए । प्रसादले १३१ तथा रमेशले १३० अंक जोडे ।

स्ट्यान्टडर्ड मेन्स एकलमा अन्नपुर्णका राजकुमार छन्त्याल र अन्नपुर्णकै सुमन गुरुङले फाइनलमा स्थान बनाए । राजकुमारले हिमालयन भोटेका राजु छन्तयाललाई तथा सुमनले बेस्टका प्रान्जल राईलाई समान ६–० ले हराए ।

स्ट्यान्टडर्ड गल्र्स एकलमा अन्नपुर्णकी अनुषा गुरुङ र बेस्टकी आस्ना लामाले फाइनलमा भेट पक्का गरिन् । अनुषाले आर्मीकी कल्पना अधिकारीलाई ६–० ले तथा आस्नाले आर्माीकी मन्जु बजगाईलाई ६–२ ले हराइन् ।

स्ट्यान्टडर्ड मेन्स टिममा अन्नपुर्ण आर्चर क्लब र नेपाल आर्मीले फाइनलमा स्थान बनाए । अन्नपुर्णले थसाङलाई ५–३ ले तथा आर्मीले हिमालयन भोट क्लब काठमाडौंलाई ६–२ ले हराए ।

स्ट्यान्टडर्ड मिक्स टिममा अन्नपुर्ण आर्चरी क्लबका अनुषा गुरुङ र राजकुमार छन्त्यालको जोडीले एपीएफकी गीता खत्री र लक्षुमन तामाङको जोडीलाई ६–० ले तथा बेस्टका आस्ना लामा र प्रान्जल राईको जोडीले आर्मीका मन्जु बजगाई रकमल दानीको जोडीलाई ६–४ ले हराएर फाइनलमा स्थान बनाए ।

प्रतियोगिताको सबै विधाका फाइनल खेल शनिबार हुनेछ । दुई दिने प्रतियोगिताको राखेपका उपाध्यक्ष पिताम्वर तिम्सिनाले एक कार्यक्रमका बीच उद्घाटन गरेका थिए । च्याम्पियनसिपमा ४७ पुरुष र १९ महिला गरी कुल ६६ आर्चरहरुले सहभागिता जनाएका छन् ।