काठमाडौं (हाम्रो खेलकुद) – १३ औं दक्षिण एसियाली खेलकुद (साग) सम्पन्न भएको एक वर्ष पनि राष्ट्रिय खेलकुद परिषद् (राखेप) ले त्यसको खर्च विवरण सार्वजनिक गर्ने तयारी गरिरहेको छ ।

राखेप सदस्य सचिव रमेशकुमार सिलवालले वाचा गरे भन्दा ९ महिना पछि सागको खर्च विवरण सार्वजनिक गर्न लागेका हुन् । साग मंसिर १५ देखि २४ गते सम्म काठमाडौं उपत्यका, पोखरा र जनकपुरमा आयोजना भएको थियो ।

सदस्य सचिव सिलावलले सागका लागि सरकारले उपलब्ध गराएको रकममा निकै बचत भएको दाबी गर्दै आएका छन् । सरकारले ३ अर्ब भन्दा बढी सागका लागि विनियोजन गरेको थियो ।

त्रिपुरेश्वरस्थित राखेप कभर्ड हलमा हलमा आइतबार सागको खर्च विवरण सार्वजनिक हुने भएको छ । सिलवालले साग सकिएको ३ महिनामा खर्च विवरण सार्वजनिक गर्ने बताएका थिए ।

खर्च विवरण सार्वजनिक त भएन बरु उनै सिलवाल राष्ट्रिय खेलकुद विकास ऐन २०७७ अनुसार पुनः राखेप सदस्य सचिव नियुक्त भएका थिए । उनी दोहोराएर नियुक्ती भएको पनि ५ महिना बितिसकेको छ ।

सिलवालले आइतबार पत्रकार सम्मेलनको आयोजना गरेर सागको हिसाब किताब सार्वजनिक गर्न लागेका हुन् । साग आयोजना तथा सञ्चालन कार्यविधिमा प्रतियोगिता सम्पन्न भएको तीन महिनाभित्र खर्च विवरण सार्वजनिक गर्नुपर्ने उल्लेख छ ।

सागको खर्च विवरण सार्वजनिक नगर्दा सदस्य सचिव सिलवालको सुशासन र पारदर्शीताको नारामाथि प्रश्न उठ्दै आएको छ । साग आयोजना तथा सामान खरिदमा भ्रष्टाचार भएको आरोप राखेपमाथि लाग्दै आएको छ । सागका विषयमा अख्तियार दुरुपयोग अनुसन्धान आयोगमा थुप्रै उजुरी परेको बताइन्छ ।

सागकै ब्याडमिन्टनको खेलाडीका जुत्तालगायतका सामान तथा म्याट खरिदमा अनियमिता भएको निष्कर्ष सहितको प्रतिवेदन छानविन समितिले राखेपलाई बुझाईसकेको छ । छानविन समितिले तयार पारेको प्रतिवेदन लामो समय बितिसक्दा समेत सार्वजनिक भएको छैन ।

नेपालले १३ औं सागमा ऐतिहासिक ५१ स्वर्ण, ६० रजत र ९६ कास्यगरी कुल २ सय ७ पदक जितेको थियो ।