काठमाडौ (हाम्रो खेलकुद) – कतार ओलम्पिक कमिटीका महासचिवसहितको प्रतिनिधि मन्डल बुधबार नेपाल आउने भएका छन् ।

प्रतिनिधिमन्डलको नेतृत्व गर्दै कतार ओलम्पिक कमिटीका महासचिव जसिम रसिद जे ए अल्बुनई पनि बुधबार काठमाडौं आउन लागेका हुन् ।

कतार ओलम्पिक कमिटीका महासचिवसहितको प्रतिनिधि मन्डलको एक दिने भ्रमणलाई नेपाल ओलम्पिक कमिटीले महत्वका साथ हेरेको छ । नेपाल ओलम्पिक कमिटिले कतार ओलम्पिक कमिटीको प्रतिनिधि मन्डलसँग बुधबारै भेटवार्ता गर्ने कार्यक्रम रहेको नेपाल ओलम्पिक कमिटीले जनाएको छ ।

कतारले सन् २०३० को एसियन गेम्सको आयोजनाका लागि आफ्नो दोवदारी प्रस्तुत गर्दैछ । २१औ एसियन गेम्सको आयोजनाका लागि कतार ओलम्पिक कमिटीले नेपालसँग औपचारिक रुपमा समर्थन माग्ने छ । बिहिबार कतारको भ्रमण टोली स्वदेश फर्केन कार्यक्रम रहेको छ ।

२०३० को एसियन गेम्सका आयोजनाका लागि दोहा र साउदी अरेबियाको रिसाद शहरबिच प्रतिस्पर्धा छ । ओलम्पिक काउन्सिल अफ एसियाको मुल्यांकन समितिले दुवै उम्मेदवार शहरको निरीक्षण गरिसकेको छ ।

डिसेम्बर १६मा ओमानको मस्कटमा हुने ३९ औं ओसीए महासभामा यसका लागि मतदान हुने छ । दोहाले यस अघि २००६ मा एसियन गेम्सको आयोजना गरेको थियो । दोहाले २०२२ को विश्वकप समेत आयोजना गर्दै छ ।