काठमाडौं (हाम्रो खेलकुद) – सशस्त्र प्रहरी बल (एपिएफ) नेपालले गत महिना बंगलादेशमा आयोजना भएको म्याराथनमा स्वर्णपदक जित्न सफल आफ्नो खेलाडी पुष्पा भण्डारीलाई नगदसहित सम्मानित गरेको छ ।
धाविका पुष्पालाई एपिएफले आफ्नो २०औं स्थापना दिवसको अवसर पारेर शुक्रबार नगद १ लाख र सम्मान पत्रले सम्मानित गरेको हो । उनलाई गृहमन्त्री राम बहादुर थापा ‘बादल’ ले १ लाख रुपैयाँको चेक र सम्मानपत्र हस्तान्तरण गरे ।
सम्मानित भएपछि पुष्पाले सम्मानले थप हौसला प्राप्त हुनुका साथै नेपाल राष्ट्रप्रति झनै जिम्मेवारी बोध भएको बताइन् । उनले विभागले खेलाडीलाई गरेको कदरप्रति पनि उच्च सम्मान रहेको बताएकी छिन् ।
पुष्पाले २६ पुसमा बंगलादेशमा भएको शेख मुजिव दक्षिण एसियाली ढाका म्याराथनमा भारतीय खेलाडीलाई पछि पार्दै उपाधि जितेकी थिइन् । पुष्षाले निर्धारित दुरी २ घन्टा ५९ मिनेट ४१ सेकेन्डमा पूरा गर्दै स्वर्ण हात पारेकी थिइन् ।
पुष्पाले १३औं दक्षिण एसियाली खेलकुद (साग) को म्याराथनतर्फ रजत विजेता खेलाडी हुन् । पुष्पाले गत मंसिरमा आयोजना भएको धारा नेपालगन्ज म्याराथनको हाफ म्याराथनमा स्वर्ण जितेकी थिइन् ।
