काठमाडौं (हाम्रो खेलकुद) – नेपाली खेलकुदको सर्वाेच्च निकाय राष्ट्रिय खेलकुद परिषद् (राखेप) ले कोरोना भाइरस (कोभिड–१९) को दोस्रो लहरको प्रभाव बढेसँगै करिब दुई महिनादेखि ठप्प रहेको खेलकुदको नियमित प्रशिक्षण शुरु गर्न अनुमति दिएको छ ।

राखेपले बुधबार पाँच वटै क्षेत्रीय खेलकुद प्रशिक्षण केन्द्रलाई पत्राचार गर्दै सम्बन्धित जिल्लामा स्वास्थ्य सुरक्षाको मापदण्ड अपनाई नियमित खेलकुल प्रशिक्षण शुरु गर्न अनुमति दिएको हो । कोरोनाको दोस्रो लहरको प्रभाव बढेपछि नेपाल सरकारको निर्देशन अनुसार गत १६ बैशाखदेखि निषेत्राज्ञा जारी रहँदा खेलकुद गतिविधि ठप्प भएको थियो ।

सरकारले पछिल्लो दिनमा कोरोना संक्रमितको संख्या घट्दै गएको र देशको अधिकांश क्षेत्रमा निषेधाज्ञालाई खुकुलो बनाउँदै लगेको र स्थिति सहज बन्दै गएको हुदा खेल गतिविधिलाई पनि चलायमान बनाउन नियमित प्रशिक्षण सञ्चालन गर्न आवश्यक भएकाले यस क्षेत्र मातहतका जिल्लाहरुमा पत्रचार गरी प्रदेश सरकार तथा स्थानिय निकायहरुसँग समन्वय गरी कोरोना भाइरसको असर कम भएका स्थानहरुमा स्वास्थ्य सुरक्षाको मापदण्डलाई पालना गरी त्यस क्षेत्र तथा जिल्लाका प्रशिक्षकहरुबाट नियमित प्रशिक्षण सञ्चालन गर्नको लागि अनुमति दिएको राखेप अन्तरगतको तालिम तथा प्रशिक्षण विभागका निर्देशक अर्जुन बहादुर विकले विज्ञप्ति जारी गरेको छ ।

अहिले काठमाडौं उपत्यकासहित देशैभर आंशिक रुपमा निषेत्राज्ञा खुकुलो हुदा निजी सवारी साधनमा जोर विजोर प्रणाली लागु गरेको छ ।