काठमाडौ (हाम्रो खेलकुद) – टोकियो ओलम्पिकको सेभ दि मिसन रहेका राष्ट्रिय खेलकुद परिषद् (राखेप) का सदस्य सचिव रमेशकुमार सिलवालको नेतृत्वमा टोकियो ओलम्पिक २०२० का लागि नेपाली जुडो र सुटिङ टोलीसहित १० सदस्यीय टोली शुक्रबार जापान प्रस्थान गरेका छन् ।
सदस्य–सचिव सिलवालको अनुपस्थितिमा राखेप बोर्ड एवं कार्यकारी समितिका सदस्य एकेन्द्र कुँवरले निमित्त सदस्य–सचिवको कार्यभार सम्हालने छन् । शुक्रबार जापान जानेमा जुडोबाट सोनिया भट्ट, प्रशिक्षक सुर्य नारायण श्रेष्ठ, व्यवस्थापक तुलसा थापा र प्रकाश शम्शेर राणा रहेका छन् ।
सुटिङबाट खेलाडी कल्पना परियार र प्रशिक्षक असिम यादवसँगै व्यवस्थापक सुनिलकुमार श्रेष्ठ रहेका छन् । पौडी टोली यसअघि नै जापान पुगिसकेको छ । पौडी खेलाडी एलेक्स शाह र प्रशिक्षक शंकर कार्की नेपालबाट तथा गौरिका सिंह बेलायतबाट जापान पुगिसकेका छन् । ओलम्पिकमा सहभागी हुने नेपाली टोलीलाई बिहीबार राष्ट्रपति विद्यादेवी भण्डारीले आफ्नै निवासमा बिदाई गरेकी थिइन् ।
१९ जुलाईमा नेपाल ओलम्पिक कमिटिका अध्यक्ष जीवनराम श्रेष्ठसँगै महासचिव निलेन्द्रराज श्रेष्ठ र युवा तथा खेलकुद मन्त्रालयका सचिव केदार न्यौपानले टोली जापान जानेछन् । एथ्लेटिक्सको टोली २५ जुलाईमा जापान जाने कार्यक्रम छ । यसपटक टोकियो ओलम्पिकमा जाने सूचीमा रहेका २६ जना रहेपनि तेज गुरुङ नजाने भएका छन् ।
नेपालबाट चार खेलमा पाँच खेलाडीले सहभागिता जनाउँदैछन् । यसपटकको ओलम्पिकमा नेपालबाट सहभागि खेलाडीमा गौरिकाले महिला १०० सय मिटर फ्रि स्टाइल र एलेक्सले पुरुष १०० मिटर फ्रि स्टाइलमा प्रतिस्पर्धा गर्नेछन् । कल्पनाले महिला १० मिटर एयर राइफल, सोनियाले महिला ४८ केजी तौल समूहमुनि तथा सरस्वती चौधरीले महिला १०० मिटरमा नेपालको प्रतिनिधित्व गर्नेछिन् ।
प्रशिक्षकमा पौडीका शंकर कार्की, सुटिङका असिम यादव, जुडोका सूर्यनारायण श्रेष्ठ र एथलेटिक्सकी इन्द्राकुमारी मल्ल छन् ।
