एजेन्सी – अलराउन्डर सकिब अल हसनको उत्कृष्ट अलराउन्ड प्रदर्शनमा बंगलादेशले जिम्बावेलाई दोस्रो ओडिआई खेलमा ३ विकेट पराजित गरेको छ । योसँगै तीन ओडिआई खेलको सिरिज बंगलादेशले एक खेल अगावै २–० जितेको छ ।

जितको लागि २ सय ४१ रनको विजयी लक्ष्य पछ्याएको बंगलादेशले ४९.१ ओभरमा ७ विकेटको क्षतिमा पूरा गर्यो । सकिब १ सय ९ बलमा ८ चौका सहित ९६ रनमा अविजित रहँदै टोलीको जित पक्का गरे । ब्लेसिङ मुर्जाबानीलाई अन्तिम ओभरको पहिलो बलमा चौका प्रहार गर्दै सकिबले जित पक्का गरेका थिए । मोहम्मद सैफुद्दिन ३४ बलमा १ चौका सहित २८ रनमा अविजित रहे ।

आठौं विकेटका लागि सकिब र सैफुद्दिनले ६४ बलमा ६९ रनको महत्वपूर्ण साझेदारी गर्दै जित पक्का गराए । कप्तान तमिम ईकबाल २०, लिटन दास २१, मोहम्मद मिथुन २, मोद्दासेन हसैन ५ र महमुदूल्लाह २६ रनमा आउट भए । जिम्बावेका ल्यूक जोंगवेले सर्वाधिक दुई विकेट लिए । मुर्जाबानी, रिचर्ड नगाराभ, वेस्ले मेधभरे र सिकन्दर राजाले एक एक विकेट लिए ।

त्यसअघि हरारे स्पोटर््स क्लबमा टस जितेर ब्याटिङ थालेको जिम्बावेले निर्धारित ५० ओभरमा ९ विकेट गुमाउँदै २ सय ४० रन बनाएको थियो । जिम्बावेका युवा ब्याट्सम्यान वेस्ले मधेभरेले ६३ बलमा ५ चौका र १ छक्का सहित सर्वाधिक ५६ रनको योगदान दिए । कप्तान बे्रन्डन टेलर ५७ बलमा ५ चौका र १ छक्का सहित ४६ रनमा हिट विकेटका रुपमा आउट भए । उनको ब्याटले स्टम्प लागेको थियो । सिकन्दर राजा ३०, डियोन मायर्स ३४ र रेजिस चकवभा २६ रनमा आउट भए । अन्यले राम्रो प्रदर्शन गर्न सकेनन् ।

बंगलादेशका तीव्र गतिका बलर शोरिफुल ईस्लामले १० ओभरमा ४६ रन खर्चेर ४ विकेट लिए । सकिब अल हसनले १० ओभरमा ४२ रन खर्चेर २ विकेट लिए । तस्किन अहमद, मेहेदी हसन र मोहम्मद सैफुद्दिनले एक एक विकेट लिए । बंगलादेश पहिलो खेलमा १ सय ५५ रनले विजयी भएको थियो । तेस्रो खेल मंगलबार हुने छ ।