एजेन्सी – अर्जेन्टिना र फ्रान्स टोकियो ओलम्पिक २०२० अन्तरगत पुरुष भलिबलतर्फको सेमिफाइनलमा प्रवेश गरेका छन् । अर्जेन्टिनाले उपाधि दावेदार इटालीलाई तथा फ्रान्सले पोल्यान्डलाई हराउँदै अन्तिम चारको यात्रा तय गरेका हुन् ।

निकै नै रोमाञ्चक र प्रतिस्पर्धात्मक बनेको खेलमा फ्रान्सले इटालीमाथि तथा फ्रान्सले पोल्यान्डमाथि समान ३–२ को सेटमा जित निकालेका हुन् । अब यि दुई टोलीबीच नै सेमिफाइनलमा भिडन्त हुनेछ ।

एरिएक एरिनामा मंगलबार भएको खेलको पहिलो सेट अर्जेन्टिनाले २१–२५ ले गुमाएको अर्जेन्टिनाले दोस्रो सेट २५–२३ ले तथा तेस्रो सेट २५–२२ ले आफ्नो पक्षमा पार्दै जिततर्फ अघि बढेको थियो । तर चौथो सेट इटालीले २५–१४ ले सहजै आफ्नो पक्षमा पारेपछि खेल पाँचौ सेटमा लम्बिएको थियो । निर्णायक सेटमा अर्जेन्टिना १५–१२ ले विजयी हुन सफल भयो ।

अर्काे क्वाटरफाइनलमा पनि फ्रान्सले पोल्यान्डमाथि ३–२ को रोमाञ्चक जित दर्ता गर्न सफल भयो । पहिलो सेट २१–२५ ले गुमाएको फ्रान्सले दोस्रो सेट २५–२२ ले आफ्नो पक्षमा पारेको थियो । तेस्रो सेट पुनः २१–२५ ले गुमाएको फ्रान्सको चौथो सेट २५–२१ ले जित्दै खेललाई पाँचौ सेटमा लम्ब्याएको थियो । निर्णायक सेटमा एकपक्षीय प्रदर्शन गरेको फ्रान्सले १५–९ को सहज जित दर्ता गर्दै सेमिफाइनलमा पुग्न सफल भयो ।

त्यसअघि मंगलबारै भएको क्वाटरफाइनलमा रसियन ओलम्पिक कमिटि (आरओसी) ले क्यानडालाई ३–० को सोझो सेटमा तथा ब्राजिलले घरेलु टोली जापानमाथि ३–० को सोझो सेटमा जित निकाल्दै सेमिफाइनलमा भेट पक्का गरेको थियो ।

सेमिफाइनलका खेलहरु ५ अगस्टमा हुनेछ । फाइनल तथा तेस्रो स्थानको खेल ७ अगस्टमा हुनेछ ।