एजेन्सी – क्याटलान क्लब बार्सिलोनाका फरवार्ड मेम्फिस डिपाएले दुई गोल गरेपछि नेदरल्यान्ड्सले फिफा विश्वकप कतार २०२२ को युरोपियन छनोटमा सानदार जित दर्ता गरेको छ ।

घरेलु मैदानमा नेदरल्यान्ड्सले मोन्टेनेग्रोमाथि ४–० को फराकिलो जित आत्मसात गरेको हो । जर्जिनो वाइनाल्डम र कोडी गाक्पोले समान एक गोल थपे ।

फिलिप्स स्टेडियम इन्डओभेनमा शनिबार राति भएको खेलको ३८औं मिनेटमा डिपाएको पेनाल्टी गोलबाट नेदरल्यानडले पहिलो हाफमा १–० को अग्रता बनाएको थियो । पेनाल्टी बक्समा लागाटोरले डिपाएलाई फल गरेपछि प्राप्त पेनाल्टीमा उनी आफैले गोल गर्न सफल रहे ।

६२औं मिनेटमा डिपाएले व्यक्तिगत र टोलीका लागि दोस्रो गोल गर्दै डच टोलीको अग्रता दोब्बर पारे । उनले कोडी गाक्पोको पासलाई गोलमा परिणत गरेका थिए ।

७०औं मिनेमा जर्जिनो वाइनाल्डमले स्टेभेन वर्गहुइसको पासमा गोल गर्दै नेदरल्यान्ड्सलाई फराकिलो जिततर्फ अग्रसर गराए । ७६औं मिनेटमा कोडी गाक्पोले टेरेल मालासियाको पासमा गोल गर्दै नेदरल्यान्ड्सलाई ४–० को फराकिलो जित दिलाए ।

यो जितपछि समूह ‘जी’ मा नेदरल्यान्ड्स ५ खेलबाट १० अंक जोडेर दोस्रो स्थानमा रहेको छ । शीर्षस्थानको टर्कीको ११ अंक छ । पराजित मोन्टेनग्रो ७ अंक जोडेर चौथो स्थानमा रहेको छ ।