एजेन्सी – विश्व खेलकुदको महारथी चीनको राष्ट्रिय खेलकुदलाई खेल सामाग्री निर्माणकर्ता केल्मीले प्रायोजन गरेको छ । शान्सी सहरमा बुधबार उद्घाटन भएको चीनको राष्ट्रिय खेलकुदको १४ औं संस्करण १२ दिनसम्म चल्नेछ ।

प्रतियोगितामा ४१ खेलका ५ सय १ इभेन्ट समावेश रहेका छन् । चीनले आफ्नो राष्ट्रिय खेलकुदकै कारण विभिन्न अन्तर्राष्ट्रिय च्याम्पियनसिपमा आफ्नो टोली पठाएको छैन । यसै महिना हुने टेबल टेनिसको एसियन च्याम्पियनसिपमा पनि चीनका खेलाडी सहभागी नहुने भएका छन् ।

राष्ट्रिय खेलकुदको आयोजक संस्थाले एक वर्ष अघि नै प्रतियोगिताको लागि प्रायोजकको रुपमा केल्मीसँग सम्झौता गरेको थियो । केल्मीले पछिल्लो समय विश्व खेलकुदमा आफ्नो बजार विस्तार गर्दै गएको छ । नेपालमा राष्ट्रिय फुटबल टोलीको प्रायोजनसँगै प्रवेश गरेको केल्मीले अहिले नेपालका तीनै विभागीय टोलीसँगै कराते र तेक्वान्दोको राष्ट्रिय टोलीलाई पनि प्रायोजन गरेको छ ।

केल्मीले इंग्लिस प्रिमियर लिगको वाटफर्ड तथा स्पेनिस लिगमा पनि अलाभेस, एस्पान्योल लगायत टोलीलाई प्रायोजन गरेको छ । गत महिना मात्र एसियाली फुटबल महासंघसँग केल्मीले सन् २०२४ सम्म सम्झौता गरेको थियो ।