काठमाडौं (हाम्रो खेलकुद)- नेपालकी कराते स्टार खेलाडी एरिका गुरुङले विश्व कराते च्याम्पियनसिप खेल्ने भएकी छिन्।

एसियाली खेलकुद र एसियन च्याम्पियनसिपकी एक मात्र रजत पदक विजेता नेपाली एरिकाले युनिभर्सालिटी कोटा मार्फत च्याम्पियनसिपमा नेपालको प्रतिनिधित्व गर्ने नेपाल कराते महासंघले जनाएको छ।

एरिकाको सहभागिताका लागि युनिभर्सालिटी कोटा मार्फत अवसर मिलेको विश्व कराते महासंघले पठाएको पत्रमा उल्लेख छ। एरिकाले ६८ केजी तौल समुहमा प्रतिस्पर्धा गर्नेछिन्।

केहि दिन अगाडि पेरिसमा भएको विश्व च्याम्पियनसिपको छनोटमा भने एरिका छनोट चरण पार गर्न असफल भएकी थिइन्। सो छनोटमा उनी मात्र एक कदम टाढा रहेकी थिइन्।

उनी राउन्ड अफ १६ मा अस्ट्रियाकी लोरा जिलरसँग ५-२ ले पराजित भएकी थिइन् । यसअघि उनले प्रारम्भिक चरणमा लगातार ३ खेल जित्दै उत्कृष्ट प्रदर्शन गरेकी थिइन्।

एरिकाले स्लोभेनियाकी ३३औं वरीयताकी मारिया जिब्रेट जालालाई २-०, मलेसियाकी मिर्जा अमिरा सुहादा बिन्ती फैजललाई ६-० र ब्राजिलकी ४८औं वरीयताकी अनुभवी खेलाडी ब्रेन्डा पेरेरालाई १-० को स्कोरमा पराजित गर्दै समूह चरणको विजेता बनेकी थिइन्। ३४ प्रतिस्पर्धीमध्ये समूह ४ मा परेकी एरिका दोस्रो चरणसम्म पुगेकी थिइन्।

पेरिस छनोटबाट हरेक तौल समूहका शीर्ष ६ खेलाडीले इजिप्टको काइरोमा हुने विश्व कराते च्याम्पियनसिपको लागि स्थान बनाएका थिए। यसअघि विभिन्न प्रतियोगिताबाट २४ खेलाडी पहिले नै छनोट भइसकेका थिए।

प्रत्येक तौल समूहमा ३२ खेलाडी सहभागी हुने छन्। जसमा दुई खेलाडी युनिभर्सालिटी कोटाबाट चयन गरिने नियम अनुसार एरिकाले विश्व कराते च्याम्पियनसिप खेल्ने मौका पाएकी हुन्। विश्व च्याम्पियनसिप नोभेम्बर २७ देखि ३० तारिखसम्म हुनेछ।

सानुमाया पहिला नै छनोट

करातेकी अर्की खेलाडी सानुमाया थिङ च्याम्पियनसिपमा एकल काताका लागि छनोट भएकी थिइन्।

विश्व कराते महासंघले नेपाल कराते महासंघलाई पत्र पठाउँदै नेपालकी सानुमाया आगामी विश्व च्याम्पियनसिपका लागि छनोट भएको जनाएको थियो ।
विश्व वरीयताको आधारमा उनी छनोट भएकी हुन् ।

गत मेमा उज्वेकिस्तानमा भएको एसियन च्याम्पियनसिपमा गरेको प्रदर्शनका आधारमा सानुमायाले यो सफलता पाएकी हुन् । छनोट भएर नेपाली खेलाडीले पहिलो पटक विश्व च्याम्पियनसिप खेल्ने पाउन लागेकी हुन् ।