ललितपुर (हाम्रो खेलकुद)- धापाखेलस्थित जेम्स स्कुलमा रोटाकिड्स नेपालले रोटरी ई क्लब अफ डिस्ट्रिक्ट ३२९२, नेपाल र थन्डरबोल्ट्स डेभलपमेन्ट सेन्टरको सहकार्यमा ‘सेल्फ–डिफेन्स कार्यशाला २०२५’ आयोजना गरेको छ।

८ देखि १४ वर्ष उमेरका करिब ५० बालबालिकालाई लक्षित कार्यशालामा व्यक्तिगत सुरक्षा, स्थितिजन्य सजगता र आधारभूत आत्म–रक्षा सीप सिकाइयो। बालबालिकाको आत्मविश्वास, सजगता र सुरक्षाबोध बढाउने उद्देश्यले कार्यक्रम आयोजना गरिएको रोटाकिड्स नेपालले जनाएको छ।

दक्षिण एसियाली खेलकुद (साग) मा ३ वटा स्वर्ण पदक जितेकी तेक्वान्दो प्रशिक्षक आयशा शाक्यले संचालन गरिन्। उनलाई अन्तर्राष्ट्रिय तेक्वान्दो खेलाडी सीता तामाङले विभिन्न अभ्यास, जुम्बा र खेलकुद गतिविधिमा सहयोग गरिन्, जसले बालबालिकालाई सिकाइसँगै मनोरञ्जन पनि प्रदान गर्‍यो।

रोटाकिड्स नेपालका अध्यक्ष सम्यक राज श्रेष्ठले सहभागी बालबालिकालाई आत्म रक्षाका सीप जीवनभर काम लाग्ने भन्दै निरन्तर सिकाइमा प्रोत्साहित गरे।

ओलम्पियन तथा सागका ४ पटकका स्वर्ण पदक विजेता दीपक विष्टले पखेलले अनुशासन, आत्मविश्वास र कडा मेहनत सिकाउने बताए।

रोटरी ई–क्लबका उपाध्यक्ष कविन्द्र नापितले कार्यक्रम सफल बनाउन सहयोग गर्ने सबैलाई धन्यवाद दिए र यस्ता बाल–केन्द्रित कार्यक्रमलाई निरन्तर समर्थन गर्ने प्रतिबद्धता व्यक्त गरे।