पोखरा (हाम्रो खेलकुद)- नवौं पोखरा स्पोर्टस् अवार्डमा वर्ष खेलाडीको उपाधि महिलातर्फ अरुणा शाही र पुरुषतर्फ विश्वास अधिकारीले जितेका छन् ।

नेपाल खेलकुद पत्रकार मञ्च गण्डकीले शुक्रवार पोखरामा आयोजना गरेको समारोहमा मनोनयनमा परेका उत्कृष्ट ३ मध्ये वर्ष खेलाडी महिलातर्फ भलिबलकी अरुणा वर्ष खेलाडी घोषित भएकी हुन् ।

पुरुषतर्फ भलिबलकै विश्वास अधिकारी वर्ष खेलाडी बनेका हुन् । दुवैले टेल्जी इलेक्ट्रिक स्कुटर साथमा अवार्ड प्राप्त गरे।

वर्ष खेलाडी महिला विधामा आइटिएफ तेक्वान्दो/ मुआथाईकी सुस्मिता थापा मगर र फेन्सिङकी कृपा गुरुङ समेत मनोनयनमा परेका थिए ।

पुरुषतर्फ टेनिसका प्रदिप खड्का र फुटबलका सुमित श्रेष्ठ थिए । अरुणा नेपाली महिला भलिबल राष्ट्रिय टोलीकी कप्तान हुन् ।

पुरुषतर्फ वर्ष खेलाडी विश्वा नवलपुर बौद्धिकाली गाउँपालिका ३ बाझोबारीका उनले २ वर्षअघि गण्डकी प्रदेशको टोलीबाट डेब्यु गरेका थिए । मिडल ब्लकर विश्वास सम्मिलित टोलीले श्रीलंकामा गत वर्ष भएको काभा यु–२० भलिबल च्याम्पियनसिपमा रजत पदक जितेको थियो ।

त्यस्तै मञ्चले लाइफटाइम अचिभेमन्ट अवार्डबाट शुटिङकी प्रशिक्षक भगवती खत्री केसीलाई सम्मान गरेको छ ।

उदीयमान खेलाडीतर्फ क्रिकेटकी रचना चौधरी उत्कृष्ट बनिन् । सो विधामा भलिबलका जितबहादुर सार्की र एथ्लेटिक्सका बादल कार्की समेत उपाधि होडमा थिए ।

टेनिसका नीरज थापा र भलिबलका रमेश केसीलाई पछि पार्दै उत्कृष्ट प्रशिक्षक फुटबलका राजेन्द्र तामाङ बने । उत्कृष्ट खेल संस्थाको अवार्ड म्याग्दी जिल्ला भलिबल संघले प्राप्त गर्यो। वर्ष उत्कृष्ट खेल पत्रकारको अवार्ड विजय नेपालले पाए । उनीले समान ३५ हजारसहित अवार्ड प्राप्त गरे ।

मञ्च गण्डकीले २०७२ सालदेखि हरेक वर्ष पोखरा स्पोर्टस् अवार्ड गर्दै आइरहेको छ ।