काठमाडौं (हाम्रो खेलकुद)- रोटरी क्लब अफ हिमालयन गल्फर्स (आरसिएचजी) र युवा गल्फर अवानी राईबीच आज सम्झौता भएको छ।

भारतमा व्यावसायिक गल्फ प्रशिक्षण तथा अध्ययनका लागि अवानीको अभिभावक मनोज खालिङ र आरसिएचजीका अध्यक्ष दमन घलेबीच सम्झौता भएको हो। सम्झौतामा अवानीको पनि उपस्थिति थियो।

सम्झौता अनुसार आरसिएचजीले अवानीलाई भारतको बेंगलोरस्थित तरुण सरदेसाई गल्फ एकेडेमीमा एक वर्षको अध्ययन र प्रशिक्षणको छात्रवृत्ति प्रदान गर्नेछ।

अवानीको प्रशिक्षण र अध्ययनमा लाग्ने कुल खर्च मध्ये ८० प्रतिशत आरसिएचजीले र बाँकी २० प्रतिशत परिवारले व्योहर्ने सम्झौतामा उल्लेख छ। उनको एक वर्षको खर्च २५ देखि ३० लाख रुपैयाँ लाग्ने अनुमान गरिएको छ।

यो छात्रवृत्ति आरसिएचजीको प्रमुख परियोजना ‘गल्फ फर अल’ अन्तर्गतको पहिलो कार्यक्रम हो। जसको उद्देश्य देशभरका युवा विशेषगरी महिलालाई गल्फ खेलप्रति आकर्षित गर्दै अवसर सिर्जना गर्नु हो।

कार्यक्रममा अध्यक्ष दमन घलेले सम्झौता नेपालका युवा प्रतिभामा लगानी गर्ने आरसिएचजीको प्रतिबद्धताको प्रतीक भएको बताए। उनले भने, ‘यो साझेदारी अवानीको सम्भावना र नेपाली गल्फको उज्ज्वल भविष्यप्रति हाम्रो विश्वासको अभिव्यक्ति हो।’

अवानीका पिता मनोज खालिङले क्लबप्रति आभार व्यक्त गर्दै भने, ‘हामी रोटरी क्लब अफ हिमालयन गल्फर्सप्रति हृदयदेखि आभारी छौं, जसले अवानीको समर्पणलाई पहिचान गरेर उसको सपना पूरा गर्न सहयोग गरेको छ।’

यही अभियानका लागिआरसीएचजीले शनिबार गोकर्ण फरेस्ट रिसोर्टमा ‘द हिमालयन स्विङ ओपन २०२५’ च्यारिटी गल्फ प्रतियोगिता आयोजना गर्दैछ। प्रतियोगिताबाट क्लबले ४० देखि ५० लाख रुपैयाँ संकलन गर्ने योजना बनाएको छ।