काठमाडौं (हाम्रो खेलकुद)- सत्यज्योत जंगबहादुर राणाले ‘द हिमालयन स्विङ ओपन २०२५’ च्यारिटी गल्फ प्रतियोगिताको उपाधि जितेका छन्।

रोटरी क्लब अफ हिमालयन गोल्फर्स (आरसिएचजी) ले ‘गल्फ फर अल’ अन्तर्गत नेपालमा उदाउँदै गरेका महिला गोल्फ खेलाडीको प्रतिभा विकास र प्रवर्द्धनका लागि आयोजना गरिएको थियो।

गोकर्णा फरेस्ट रिसोर्ट गल्फ क्लबमा आज भएको प्रतियोगितामा सत्यज्योतले ४४ स्टेबलफोर्ड अंकसहित उत्कृष्ट प्रदर्शन गर्दै विजेता बने।

रोविन राणा ३६ अंकसहित उपविजेता बने। फुन्तसोक एन. लामाले ३५ ग्रस स्कोरसहित ‘बेस्ट ग्रस अवार्ड’ जिते र ६ वटा बर्डी बनाएर ‘मोस्ट बर्डिज अवार्ड’ पनि हात पारे।

६० वर्ष माथि मंगोलियाका मानार्थ कन्सुल टि. जी. श्रेष्ठले ३१ अंकका साथ ट्रफी जिते । अनिरुद्ध सिंह २९ अंकसहित दोस्रो भए।

महिला खेलाडीमा ‘गल्फ फर अल’ छात्रवृत्ति प्राप्त
गरेकी अवनी राईले ३२ अंकसहित विजयी भइन् । सम्झना खत्री ३१ अंकसहित दोस्रो भइन् ।

रोटेरियन खेलाडीमा रविन्द्र तिवारी विजेता बने । विपना श्रेष्ठले ‘क्लोजेस्ट टु द पिन’ र सोम गुरुङले ‘लङ्गेस्ट ड्राइभ’ पुरस्कार पाए।

स्टेबलफोर्ड ३/४ ह्यान्डिक्याप ढाँचामा १८ होलमा भएको प्रतियोगितामा ८ महिला सहित १ सय ३ गल्फरको सहभागिता थियो।

उद्योग, वाणिज्य, आपूर्ति, कानुन, न्याय, संसदीय मामिला, भूमिव्यवस्था, सहकारी तथा गरिबी निवारण मन्त्री अनिल कुमार सिंह,आरसिएचजीका अध्यक्ष मेजर दमन घरलगायतले विजेता खेलाडीलाई पुरस्कृत गरे।

प्रतियोगितालाई शिखर इन्स्योरेन्स , भाटभटेनी सुपरमार्केट , सुमित एयर , फिस्टेल एयर , मातृका आई, स्टार एलायन्स , हार्भेस्ट मुन र बिवाइडी नेपालले प्रायोजन गरेका थिए।