७ खेलाडीलाई ह्याम्स हस्पिटलको सम्मान

काठमाडौं (हाम्रो खेलकुद)– ह्याम्स हस्पिटलले विभिन्न खेलका सात खेलाडीलाई शनिबार सम्मानित गरेको छ । खेलकुदको माध्यमबाट नेपाललाई उचो राख्ने काम गरेका विभिन्न खेलका सात खेलाडीलाई हस्पिटलले उपहारसहित सम्मानित गरेको हो । मण्डिखाटारस्थित हस्पिटलको नवनिर्मित भवनमा एक कार्यक्रमको आयोजना गर्दै हस्पिटलका अध्यक्ष रामशरण भण्डारी, वरिष्ट मुटुरोग विषेशज्ञ डा. भगवान कोइराला, डा. भाष्कर राज पन्त लगायतले सम्मान गरेका थिए ।

सम्मानित हुने खेलाडीमा एसियाली शारीरिक सुगठनका स्वर्ण विजेता महेश्वर महर्जन, दक्षिण एसियाली उसुका स्वर्ण विजेता राजकुमार रसाइली, भलिबल खेलाडी कमला पुन, साम्बो खेलाडी कृष्णलाल तामाङ, मिक्स मार्सल आर्ट्सका सन्तोष साउद, बक्सिङका म्याक्स बस्नेत र स्क्वासकी भावना सुनुवार पनि सम्मानित भएकी हुन् ।

खेलकुद चिकित्सा र खेलका दौरान खेलाडीले ब्यहोर्न सक्ने सम्भावित इन्जुरीमा विषेश ध्यान राख्ने उद्देश्यले अत्याधुनिक चिकित्सा प्रविधिका साथ ह्याम्स हस्पिटल स्थापना भएको वरिष्ठ चिकित्सक प्रोफेसर डाक्टर भगवान कोइरालाले बताए ।

कार्यक्रममा हस्पिटलका चिकित्सकहरुले खेलाडीले ब्यहोर्न सक्ने सम्भावित इन्जुरी कसरी रोकथाम गर्ने, इन्जुरी भएको अवस्थामा पनि त्यसको उपचार पद्धती र प्राथमिक उपचारको विषयमा धारणा राखेका थिए । हस्पिटलले खेलकुद स्वास्थमा खेलाडीलाई विषेश प्राथमिकता दिने बताए ।