काठमाडौं (हाम्रो खेलकुद) – विश्वव्यापी शारीरिक सुगठन प्रतियोगिताको स्वर्णपदक विजेता महेश्वर महर्जन मंगलबार स्वदेश फर्किएका छन् । थाइल्यान्डमा एक साताअघि सम्पन्न प्रतियोगिताको १०औं संस्करणको ७५ केजी तौल समूहमा स्वर्ण जितेका महर्जनलाई त्रिभुवन अन्तर्राष्ट्रिय विमानस्थलमा भब्य स्वागत गरियो ।
महेश्वरलाई स्वागत गर्न राखेपका उपाध्यक्ष पिताम्बर तिम्सिना, नेपाल शारीरिक सुगठन संघका अध्यक्ष राजेशबाबु श्रेष्ठ, संघका पदाधिकारीलगायत सयौं समर्थकहरु विमानस्थलमा पुगेका थिए । महर्जनले नेपाललाई स्वर्ण दिलाएको क्षण अविस्मरणीय रहेको बताए । ‘मैले विश्व च्याम्पियन बन्ने सपना देखेको थिएँ । त्यो पूरा भएको छ । तर आफ्नो देशको नाम उच्च बनाउन पाएपनि पदक जित्दाको क्षण एक्लो महसुस गरे । त्यसले मलाई भावुक बनायो,’ महेश्वरले भने, ‘देशको लागि पदक जितिरहँदा मैले आफूलाई एक्लो भएको महसुस गरें पाए । पदक थाप्दा नेपालको झन्डा बोक्न पाउँदा निकै भावुक भएँ ।’
महेश्वरले विमानस्थलमा भव्य स्वागत पाउँदा खुसी लागेको बताए । ‘ आज स्वागतका लागि यति धेरै समर्थक आउनुभएको छ । मलाई एकदमै खुशी लागेको छ । सबैको साथ र सहयोगले नै मैले यो सफलता हासिल गरेको हो,’ उनले भने ।
राष्ट्रिय खेलकुद परिषद (राखेप) का उपाध्यक्ष पिताम्बर तिम्सिनाले पदक विजेता महेश्वरको सफलताको उच्च कदर गर्दै सरकारसमक्ष पुरस्कारका लागि पहल गर्ने पनि बताए । नेपाल शारीरिक सुगठन संघका अध्यक्ष राजेशबाबु श्रेष्ठले स्वर्णधारी महर्जनलाई उचित सम्मान गर्नुपर्ने बताए । श्रेष्ठले व्यक्तिगत रुपमा महर्जनलाई तीन लाख रुपैयाँले पुरस्कृत गर्ने पनि बताए ।
महेश्वरले आफ्नो तौल समूहमा १२ देशका खेलाडीलाई पछि पार्दै स्वर्णपदक जितेका थिए । महेश्वरले स्वर्ण जित्दा भारतका खेलाडी दोस्रो तथा सिंगापुरका खेलाडी तेस्रो भएका थिए । महेश्वरले यसअघि भुटानमा सम्पन्न ५०औं एसियन बडिबिल्डिङ च्याम्पियनसिपमा स्वर्णपदक जितेका थिए ।
