काठमाडौं (हाम्रो खेलकुद)- नेपालमा मंसिरमा आयोजना हुने १३औं दक्षिण एसियाली खेलकुद (साग) को तयारीको सिलसिलामा राष्ट्रिय खेलकुद परिषद् (राखेप) ले दोस्रो चरणको विशेष बन्द प्रशिक्षणमा ७ खेलका १ सय ९ खेलाडीलाई समावेश गरेको छ ।

सोमबार समावेश भएका खेलाडीमा तेक्वान्दोका २३, कराँतेका २१, बक्सिङका १६, उसुका २२, पौडीका १६,फेन्सिङका ६ र गल्फका ५ जना रहेका छन् । हाल सम्म १४ खेल विशेष प्रशिक्षणमा समावेश भई सकेका छन् । राखेपका सदस्य–सचिव केशवकुमार बिष्टले समावेश खेलाडीलाई राष्ट्रिय अभिभारा पुरा गर्नका लागि नयाँ संकल्पका साथ अगाडि बढेका बताए ।

‘अहिले हामी १३औ सागको बिशेष प्रशिक्षण समावेश भएका छौं,यो बिगतको भन्दा बिशेष हुन्छ । म तपाईहरुलाई अनुरोध गर्छु, यसलाई सामान्य नलिनु होला । हाम्रो एउटै साझा उद्देश्य हो । १३औं सागलाई भब्य सब्य र परिणामुखी बनाउने हो ’ सदस्यचिव विष्टले भने, ‘हामी सबैले अ–आफ्नो जिम्मेवारी अनुशासित, इमान्दारीका साथ निर्वाह गरौ । हामीले खेलाडी सुबिधामा पनि ध्यान पुर्याएका छौं । असार देखि तपाईहरुको भत्ता २ हजार हुनेछ ।’

सदस्य–सचिव बिष्टले बैकुढ मानन्धरको उदहारण दिदै भने–सुबिधा नै सवै हो म भन्दिन, खाली खुट दौडिएर सागमा बनाएका रेकर्ड सुबिधा सम्पन्न देशका ५० हजारका जुत्ता लगाएर दौडने खेलाडीले अहिले सम्म तोड्न सकेका छैनन् । त्यसैले खेलाडीको अनुसाशन र स्किल नै पहिलो कुरा हो ।’

सदस्य सचिव बिष्टले विशोष प्रशिक्षणमा खेलाडीसँगै प्रशिक्षकले पनि राम्रो गर्न नसके राष्ट्रिय टिमबाट बहिरिने बताए । २७ खेल समाबेश गरिएकोमा अन्य खेल असार १ गते भित्र बिशेष प्रशिक्षणमा समावेश भई सक्नेछन् ।