काठमाडौं (हाम्रो खेलकुद)– नेपाल कुस्ती संघको विवाद पुनः बल्झिने सम्भावना बढेको छ । राष्ट्रिय खेलकुद परिषद् (राखेप) का निर्वतमान सदस्य सचिव केशवकुमार विष्टले आफ्नो कार्यकालको अन्तिम दिन कुस्ती संघको पूर्नगठन गरेको जानकारी राखेपले सोमबार पत्रकार सम्मेलनमार्फत गराएको छ ।

राज माहेम्मद मिया अन्सारी अध्यक्षको अध्यक्षतामा राखेपले असार ९ गते संघ पूर्नगठन गरेको बताइएको छ । पूर्नगठित संघले राखेपका उपाध्यक्ष पिताम्बर तिम्सिनाको प्रमुख आतिथ्यतामा असार १५ गते संघको बैठक बसेको सोमबार पत्रकार सम्मेलनमा जानकारी दिइयो ।

अर्का तिर कार्यकाल सकिएकोले निर्वाचनको स्वीकृति माग गर्दा निर्वातमान सदस्य सचिव विष्टले नियतवश नदिएको दाबी गर्दै कुस्ती संघका अध्यक्ष नारायणदेव राणाले राखेपको निर्णय विरुद्ध अदालत जाने बताएका छन् ।

‘संघ र परिषदबीच चुनाव गर्ने विषयमा सहमति भएको थियो । तर, एकाएक पछि उहाँले हामीलाई चुनाव गर्न स्वीकृति दिनु भएन । असार ७ गतेका लागि निर्वाचन गर्ने तयारी गरेका थियौं । स्वीकृति नपाएपछि चुनाव हुने वातावरण नै भएन ’ राणाले भने, ‘पछि सदस्य सचिव विष्टले आफ्नो कार्यकालको अन्तिम दिन ९ गते सुटुक्क निर्वाचनको लागि स्वीकृति दिनु भएछ । हामीलाई निर्वाचन गराउन नसकेको भन्दै संघको पुर्नगठन भएको सुने । यो कतिसम्मको न्यायको विषय हो ।’

राणाले संघलाई नेकपामय बनाउन काम भएको आरोप पनि लगाएका छन् । राखेपको पूनगर्ठनको विरुद्धमा मंगलबार अदालत जाने समेत बताए । पूर्नगठित संघको वरिष्ठ उपाध्यक्षमा समिम मिया अन्सारी, उपाध्यक्षमा मनोहर रायमाझी र बसन्त भण्डारी रहेका छन् ।

महासचिवमा रिता कोइराला, सचिवमा साहिल अन्सारी र कोषाध्यक्षमा जफरुल्ला मिया मन्सुरी रहेका छन् । सदस्यमा ललन प्रसाद यादव, जिनत अन्सारी, डा।पर्मरचन्द्र सेन, सानु लामा, निसा अहमद खान, जुनैद इद्रीसी, सलामत राइन र नन्दलाल यादव छन् ।

यसअघि कुस्तीको दुई संघ अस्तित्वमा थियो । राणा अध्यक्षमा रहेको संघलाई राखेपको मान्यता थियो । अन्सारी नेतृत्वको संघलाई नेपाल ओलम्पिक कमिटी (एनओसी) को मान्यता थियो । तीनै अन्सारीको नेतृत्वमा राखेपले अहिले कुस्ती संघ पूर्नगठन गरेको छ ।

राणा नेतृत्वको संघले असार पहिलो साता पत्रकार सम्मेलन गर्दै संघको चुनावी साधारण सभालाई राखेपले पटकपटक पहल गर्दा पनि स्वीकृती नदिएको आरोप लगाएको थियो ।