काठमाडौं (हाम्रो खेलकुद)– विगतमा लामो समय विवादमा रहेको नेपाल ओलम्पिक कमिटी (एनओसी) को विवाद औपचारिक रुपमै अन्त्य भएको सन्देश बिहीबार बसेको ११ औं बार्षिक साधारण सभा दिएको छ ।

एक दशक भन्दा लामो समय राष्ट्रिय र अन्तर्राष्ट्रिय मान्यता प्राप्त एनओसी दोहोरो अस्तित्व गरेको थियो । अन्तर्राष्ट्रिय मान्यता प्राप्त एनओसीको नेतृत्व संघिय सांसद समेत रहेका जीवनराम श्रेष्ठले गरिरहेका छन् । राष्ट्रिय मान्यता प्राप्त एनओसीको रुक्मशम्सेर राणा अध्यक्ष थिए ।

श्रेष्ठ सभापत्विमा भएको साधारण सभामा राणाले भाग मात्र लिएनन् एनओसीको मानार्थ अध्यक्षका रुपमा सफलताको शुभकामना समेत दिए । भर्चुअल साधारण सभामा राणाले नेपाली खेलकुदका अभिलेखहरु संकलन र संरक्षण गर्न सुझाव दिए ।

सन् २००७ मा साधारण सभामार्फत नेतृत्व हस्तान्तरण गरेपनि पछि एनओसीमा विवाद परेको थियो । त्यसपछि सर्वोच्चको एउटा निर्णयले राणाको नेतृत्वमा रहेको एनओसीलाई पुर्नस्थापित गरेको थियो । पूर्व अध्यक्ष ध्रुबबहादुर प्रधानले नेतृत्व गरेको एनओसीलाई अन्तर्राष्ट्रिय मान्यता थियो ।

सोही एनओसीमा गत वर्ष श्रेष्ठ दोस्रो कार्यकालका लागि निर्वाचित भएका थिए । गत वर्षको साधारण सभाले पूर्व अध्यक्षलाई एनओसीको मानार्थ अध्यक्ष राख्ने वैधानिक व्यवस्था गरेको थियो । सोही अनुरुप राणा र प्रधान एनओसीका मानर्थ अध्यक्ष रहेका हुन् ।

सभाले महासचिव निलेन्द्रराज श्रेष्ठले प्रस्तुत गरेको गतिविधिको विरण समेटिएको प्रतिवेदनलाई पास गरेको थियो । त्यस्तै अध्यक्ष श्रेष्ठले पेश गरेको आर्थिक नियमावली र कर्मचारी निमावलीलाई पनि साधारण सभाले अनुमोदन गरेको एनओसीले जनाएको छ ।

आर्थिक वर्ष २०७६/७७ को आर्थिक प्रतिवेदन र सन् २०२१ को अनुमानित बजेट सर्वसम्मत बाट पारित भएको बताएको छ । अर्को वार्षिक साधारण अर्को कात्तिक १९ र २० गते गर्ने निर्णय भएको छ ।

त्यसअघि प्रमुख अतिथि रहेको युवा तथा खेलकुद मन्त्री जगत बहादुर विश्वकर्माले एनओसीले कोभिड को महामारीमा पनि विभिन्न अनलाइन तालिम तथा प्रशिक्षणहरु संचालन गरेमा प्रशंसा गरे । महामारीमा पनि सधारण सभा आयोजना गरेकोमा उनले एनओसीलाई बधाई दिए ।

राष्ट्रिय खेलकुद परिषदका सदस्य सचिव रमेश सिलवालले सभाको सफलताको कामना गर्दे, अहिले अवस्थामा नेपाल सरकारको प्रोटोकल लाई ध्यानमा राखी खेलकुदका कार्यक्रमहरु संचालन गरिने जानकारी दिए ।

मानार्थ अध्यक्ष प्रधान सभाको सफलता तथा वर्तमान परिस्थितिमा कसरी खेलकुद लाई अगाडि बढाउने भन्ने सल्लाह तथा सुझाव दिए । ओलम्पियन दीपक विष्ट, नेपाल खेलकुद पत्रकार मञ्चका अध्यक्ष श्री देवेन्द्र सुवेदी, एनओसीका सल्लाकार तथा पूर्व खेलकुद मन्त्री शरतसिंह भण्डारीले सभाको सफलताको शुभकामना दिए ।