काठमाडौं (हाम्रो खेलकुद)– पहिलो पटक ओलम्पिकमा समावेश गरिएको करातेको छनोटको तयारीमा रहेको नेपाली कराते टोलीलाई मंगलबार दक्षिण एसियाली खेलकुद (साग) का पदक विजेतासहित खेलकर्मीले संयुक्त रुपमा खेल सामाग्री हस्तान्तरण गरेका छन् ।
नेपाली कांग्रेसको केन्द्रीय खेलकुद विभागका सचिव मीनकृष्ण महर्जन, ललितपुर किक बक्सिङ संघका अध्यक्ष विनोद महर्जन र आठौं सागका करातेका स्वर्ण पदक विजेता रवि महर्जनले ओलम्पिक छनोटको तयारीमा रहेका २ खेलाडी र प्रशिक्षकलाई केल्मीको ब्याग, ट्रयाकसुट र जुत्ता प्रदान गरेका हुन् ।
छनोटमा सहभागी हुनेमा १३ औं सागका स्वर्ण पदक विजेता अनु अधिकारी र नवीन रसाइली छन् । आठौं र नवौंका स्वर्ण पदक विजेता रहेका श्रेष्ठ १३ औं सागका प्रशिक्षक पनि हुन् । सागकै प्रदर्शनका आधारमा नेपाल ओलम्पिक कमिटीले अनु र नवीनलाई ओलम्पिक छनोटको प्रशिक्षणमा सामेल गराएको थियो ।
गत वर्ष वर्षबाटै ओलम्पिक छनोटका लागि तयारी सुरु गरिएपनि कोरोना महामारीले विश्वलाई नै प्रभाव पारेपछि सन् २०२० मा आयोजना हुनुपर्ने ओलम्पिक अर्को वर्षका लागि सारिएको थियो ।
