काठमाडौं (हाम्रो खेलकुद) – राष्ट्रिय खेलकुद परिषद् (राखेप) का पूर्व वरिष्ठ कुस्ती प्रशिक्षक तथा तालिम तथा प्रशिक्षण विभागका पूर्व उपनिर्देशक बिद्या सागर पोखरेलको ६३ वर्षको उमेरमा शुक्रबार विहान निधन भएको छ ।

नेपाली कुस्तीका पहिलो प्रशिक्षक पोखरेलको हृदयघातका कारण काठमाडौंको कीर्तिपुरस्थित निवासमै विहान ११ः३० बजे निधन भिएको राखेप तालिम तथा प्रशिक्षण विभागका पूर्व उपनिर्देशक ब्रिजेन्द्र हमालले जानकारी दिए । विहान खाना खाईरहेको अवस्थामा छातीमा दुखाई महसुस भएको केहि समयमानै उनको निधन भएको पारिवारले जनाएको छ ।

फुटबलका खेलाडीको रुपमा खेल जीवन सुरु गरेका पोखरेलले सन् १९८८ मा भारतको पटियालाबाट कुस्ती प्रशिक्षकको प्रशिक्षण लिएका थिए । त्यसपछि उनी राखेपमा नियुक्त भएका थिए । उमेर हदका कारणकारण केहि वर्षअघि उनी राखेपबाट सेवा निबृत्त भएका थिए ।

उनकै प्रशिक्षणमा नेपालमा धेरै कुस्ती खेलाडीहरु उत्पादन भएका थिए । उनले १९३३ का बंगलादेशको ढाकाबाट अन्तराष्ट्रिय निर्णायकको परिक्षा उत्तीर्ण गरेका थिए । पोखरेलले कुस्ती खेलको विकास र विस्तारमा क्रममा अनवरतरुपमा २६ बर्ष देखि कुस्ती संघको महासचिवको जिम्मेवारी सम्हालेका थिए । उनी कुस्तीका अन्तर्राष्ट्रिय निर्णायक तथा दक्षिण एसियाली कुस्ती महासंघका पूर्व महासचिव पनि थिए ।

२०१५ साल कार्तिक १५ गते जन्मिएका पोखरेल गोरखा दक्षिण बाहु चौथो बाट विभुषित थिए । उनका दुई श्रीमती, दुई छोरा र दुई छोरी रहेको हमालले जानकारी गराए ।