काठमाडौं (हाम्रो खेलकुद)– नेपाली खेलकुदले अन्तर्राष्ट्रिय खेलकुदमा प्राप्त गरेका सफलता र सहभागितालाई समेट्ने उद्देश्यले स्पोर्टस नेपाल ओआरजी वेब साइट सञ्चालनमा ल्याइएको छ ।

नेपाल ओलम्पिक कमिटी (एनओसी) को सहयोगमा ओलम्पिक सोलिडारिटी अन्तर्गत नेपाल ओलम्पिक संग्राहलयले वेब साइट सञ्चालनमा ल्याएको हो । एनओसीका अध्यक्ष जीवनराम श्रेष्ठले वेब साइटको मंगलबार सातदोबाटोस्थित एनओसी मुख्यालयमा उद्घाटन गरे ।

नेपाली खेलकुदको डिजिटल अभिलेखिकृत प्रोजेक्ट (२०२०–२०२१) को पहिलो चरणमा नेपाली खेलकुदको इतिहाससँग जोडिएका सामग्रीको संकलन र अभिलेखिकरण सुरु गरिएको संग्राहलयले जनाएको छ । यसका लागि सोलिडारिटी कार्यक्रमबाट १५ हजार डलर प्राप्त भएको थियो र यसको औपचारिक सुरुआत गत वर्षको मंसिर १ गतेबाट भएको थियो ।

एनओसी अध्यक्ष श्रेष्ठले अनलाइन संस्करणले नेपाली खेलकुदको पुरानो र नयाँ पुस्तालाई जोड्ने काम गर्ने जनाउँदै नेपाली खेलकुद इतिहास निकै पुराना भएपनि यसलाई अभिलेखीकरण गर्नु पर्ने काम धेरै बाँकी रहेको बताए । उनले त्यसका लागि एनओसीको सधै सहयोग रहने बताए ।

एनओसीका महासचिव निलेन्द्रराज श्रेष्ठले नेपाली खेलकुदलाई अभिलेखीकरणको सुरुआत मात्र भएको र यसको निरन्तरता आवश्यक रहेको बताए । एनओसी उपाध्यक्ष तथा कार्यकारी निर्देशक चतुरानन्दराज बैद्यले नेपाली खेलकुदका लागि इतिहास अभिलेखीकृत गर्ने प्रयासको ठूलो महत्व रहेको बताए ।

संग्राहलयका अध्यक्ष क्षितिजअरुण श्रेष्ठले वेब साइटले समेट्ने विषयमा जानकारी दिएका थिए । कार्यक्रममा कमिटीका उपाध्यक्षद्वय ज्योति राणा र उपाध्यक्ष अशोक वज्राचार्य, सचिव तुलसी थापा तथा सदस्य राम अवाले र रमेश सिवाकोटीको पनि उपस्थिति रहेको थियो ।