नेपालगन्ज (हाम्रो खेलकुद)- नेपालगन्ज राष्ट्रिय खुला पौडी च्याम्पियनसिपको दोस्रो संस्करणको तयारी तीव्र गरिएको छ ।

प्रतियोगितामा सहभागिताको लागि सोमवार सम्म १ सय भन्दाबढी खेलाडीले नामदर्ता गराईसकेको आयोजक नेपालगन्ज स्विमिङ क्लबले जानकारी दिएको छ । प्रतियोगिता नेपालगन्ज रंगशाला स्थित पौडी पोखरीमा कात्तिक १४ र १५ गते हुँदैछ ।

प्रतियोगिताको व्यवस्थापकीय तयारीको लागि नेपाल पौडी संघका प्राविधिक‌ टोलीले सोमवार नेपालगन्ज पौडी पोखरीको निरीक्षण गरे । प्राविधिक टोलीमा विष्णु खड्का, अनिष महर्जन, दिपक सागर सिंह छन् ।

प्रतियोगिताले नेपालगन्जमा पौडी खेलाडीको संख्या र स्तरलाई समेत बढाउन सहयोग गर्ने विश्वास लिएको आयोजक नेपालगन्ज स्वीमिङ क्लबका अध्यक्ष केशवराज न्यौपानेले बताए।

प्रतियोगितामा यु–८, यु–१०, यु–१२, यु–१४, यु–१७ र अतिरिक्त उमेर समुहमा प्रतिस्पर्धा हुनेछ । प्रतियोगितामा सर्वोत्कृष्ट हुने पुरुष र महिला खेलाडीलाई पुरस्कार दिइनेछ व्यवस्था गरिएको छ ।

प्रतियोगितामा यु–८ समुहका खेलाडीले २५ मिटर, यु–१० उमेर समुहले ५० मिटर, यु–१२ र यु–१४ उमेर समुहले ५० र १ सय मिटर तथा खुला समुहका खेलाडीले २ सय मिटर र ४ सय मिटरको इभेन्ट्समा प्रतिस्पर्धा गर्नेछन् ।

प्रतियोगितामा ५६ वटा इभेन्ट्स समावेश गरिएको पौडी आयोजक क्लबका वरिष्ठ उपाध्यक्ष सूर्यमणी अधिकारीले बताए ।

नेपाल पौडी संघसँग सहकार्य गरेर आयोजना गर्न लागिएको प्रतियोगितामा नेपालगन्ज न्युरो अस्पताल, सिद्र्धाथ बैंक, जस्मिन पेन्ट्स, क्रिष्टिलो वाटर, वाल्किन र डटवर्कले सहयोग गरेका छन् ।