काठमाडौं (हाम्रो खेलकुद)- सरकारी मान्यताको नवगठित नेपाल ओलम्पिक कमिटी (एनओसी ) तदर्थ समितिको संयोजक ध्रुव बहादुर प्रधान नेतृत्वको टोलीले आज युवा तथा खेलकुद मन्त्री तेजुलाल चौधरीसंग भेटवार्ता गरेको छ ।

तदर्थ समितिको नयाँ नेतृत्वले पहिलो पटक बिहिवार औपचारिक पत्रकार सम्मेलन गरी आफ्ना भावी कार्ययोजना सार्वजानिक गरेपछि माननीय मन्त्रीसँगको यो पहिलो भेटघाट हो ।

तदर्थ समितिका संयोजक लगायत ९ सदस्य टोलीसँगको भेटघाटमा राष्ट्रिय खेलकुद परिषद (राखेप) का सदस्य सचिव टंक लाल घिसिङ, युवा तथा खेलकुद मन्त्रालयका खेलकुद महाशाखाका प्रमुख सहसचिव रामचरित्र मेहताको समेत उपस्थिति थियो ।

भेटघाटमा अगामी वर्ष जापानमा हुने एसियन खेलकुदमा नेपालको प्रतिनिधित्वलाई सुनिश्चित बनाउनका लागि अविलम्ब पहलकदमी लिने साथै एनओसीका गतिविधिलाई कानुन बमोजिम सक्रिय बनाउन राखेप र मन्त्रालयले खेल्नुपर्ने भूमिका बारे समेत छलफल भएको बताइएको छ।

मन्त्रालय र राखेपसँग समन्वय र सहजीकरण गरेर एनओसीले आफ्ना गतिबिधि बढाउन मन्त्रीले तदर्थ समितिलाई निर्देशन दिएको जनाइएको छ।

जीवनराम श्रेष्ठ नेतृत्वको रहेको अन्तर्राष्ट्रिय मान्यता प्राप्त एनओसीको बैठक पनि आजै बसेको छ।