पोखरा (हाम्रो खेलकुद) – आहा! रारा गोल्डकप फुटबल प्रतियोगिता २०७८ को २० औं संस्करण अन्तर्गत नेपाल एपिएफ फुटबल क्लब र मछिन्द्र फुटबल क्लबबीच जारी पहिलो सेमिफाइनलको पहिलो हाफ १-१ को बराबरीमा सकिएको छ ।

एपिएफले खेलमा सुरुवाती अग्रता लिएपनि मछिन्द्रले अन्तिम समयमा गोल गर्दै खेल बराबरीमा ल्याएको हो । खेलको दुवै गोल फ्रिकिकमा हेडरमार्फत सम्भव भएको हो । एपिएफका लागि सनिस श्रेष्ठले गोल गरेका थिए भने मछिन्द्रका ओमोलाजा करीमले बराबरी गोल फर्काए ।

छैटौं मिनेटमा विकी तामाङको क्रसमा अर्मान्ड विडोमले पेनाल्टी बक्समा टर्न गर्दै गरेको सशक्त प्रहार पोस्ट नजिकैबाट बाहिरिदा एपिएफ अग्रता लिनबाट चुक्यो । १४औं मिनेटमा मेसुके ओलुमोउको प्रहारलाई एपिएफका गोलरक्षक युया कुरियामाले सहजै नियन्त्रणमा लिए । १९औं मिनेटमा अर्मान्डको क्रसमा कप्तान नविन लामालाई लागेको बलमा प्रदीप लामाले गरेको प्रहारलाई गोलरक्षक सुर्य अधिकारीले मुस्किलले नियन्त्रणमा लिए । २४औं मिनेटमा अर्मान्डको प्रहारलाई गोलरक्षक सुर्यले सहजै बचाए ।

२५औं मिनेटमा सनिस श्रेष्ठले गोल गर्दै एपिएफलाई सुरुवाती अग्रता दिलाए । छिरिङ गुरुङले मणि लामालाई फउल गरेपछि मणि आफैंले झन्डै ३० यार्ड टाढाबाट गरेको फ्रिकिकलाई सनिसले उत्कृष्ट जम्प गर्दै हेडमार्फत सुन्दर गोल गर्न सफल भएका थिए । २८औं मिनेटमा ओमोलाजा नुरेन करिमको फ्रिकिकलाई युया कुरियामाले पञ्च गर्दै बचाउँदा मछिन्द्र बराबरीबाट चुक्यो । ३२औं मिनेटमा छिरिङको पासमा अभिषेक रिजालले हेडर सदुपयोग गर्न सकेनन् ।

४० औं मिनेटमा मछिन्द्रले खेल बराबरीमा ल्यायो । मछिन्द्रका लागि ओमोलाजा नुरेन करीमले गोल गरे । कप्तान रञ्‍जित धिमालको फ्रिकिकलाई करीमले ६ यार्ड बक्स नजिकबाट हेडरमार्फत गोल गरेका थिए । खेलको पहिलो हाफ सकिएको सिठीपछि खेलाडीबीच विवाद हुँदा रेफ्री नविन्द्र महर्जनले एपिएफका आवास लामिछाने र मछिन्द्रका बुद्ध चेम्जोङलाई पहेंलो कार्ड देखाएका थिए ।

यस खेलमा जित हासिल गर्ने टोलीले प्रतियोगिताको फाइनलमा स्थान पक्का गर्नेछ । विहीबार हुने दोस्रो सेमिफाइनलमा मनाङ मर्स्याङ्दी क्लब र त्रिभुवन आर्मी फुटबल क्लबले प्रतिस्पर्धा गर्नेछन् ।

मछिन्द्र विरुद्ध एपिएफको खेलको प्रत्यक्ष प्रसारण हेर्न यहाँ थिच्नुहोस्